O movemento “2020: Rebelión polo clima” (que se forma a partir do movemento europeo “By2020 we rise up”) é unha plataforma de acción non violenta fronte á crise climática e ecolóxica que apela á diversidade de loitas, e fai un chamamento a rebelarse dende a solidariedade e a empatía contra o sistema de explotación, para o que facemos uso de tantas ferramentas non violentas de cambio social, baixo o paraugas da xustiza climática.

Entendemos que fomentar o consumismo é un despropósito que vai en contra do comportamento sustentable que todas deberíamos ter co noso planeta, así como unha das principais prácticas capitalistas que nos teñen levando á emerxencia climática.

As luces de Nadal de Vigo, responden ao ostentoso tanto na súa instalación como na súa promoción e gardan unha finalidade clara: fomentar o consumismo e a compra compulsiva e irracional, algo que non fai máis que perpetuar un modelo económico incompatible co modelo sustentable de vida que se supón, debemos adoptar para asegurar o noso futuro. Entendemos, ademais, que as decoracións de Nadal supoñen un importante malgasto de cartos, que se poderían empregar para fomentar comportamentos de respecto ao medio, máis cando o Concello de Vigo aprobou no pleno de setembro a moción presentada para a Declaración da EMERXENCIA CLIMÁTICA. Compre que a mesma non sexa unha simple declaración baleira de contido e responda á responsabilidade que se espera dos nosos representantes.

Ante a falta de resposta dos gobernos, nós si actuamos. Cada vez con máis forza nas seguintes ondadas, con determinación e novas estratexias. Pero tamén con alegría, amor e unha rabia imparables.

En Galiza, somos persoas de varias organizacións as que nos sumamos a esta iniciativa, para actuar dende o ámbito local e darlle forza a este movemento. Dende Extinction Rebellion, ECOAR))) Global, Ecoloxistas en Acción… apoiamos a iniciativa a nivel Ibérico (2020: Rebelión por el clima) e participamos nela.

Manifesto

O día 23 de Novembro, “2020:Rebelión polo Clima” realizamos unha acción directa non violenta en Vigo, coincidindo co acto de acendido das luces de Nadal en Vigo. O obxectivo é visibilizar e chamar a atención sobre o problema do consumismo. Escollemos este momento por considerar o mesmo o foguete de saída do período de máis consumo innecesario do ano.

Entendemos que fomentar o consumismo (non confundir con consumo) é un despropósito que vai en contra do comportamento sustentable que todas deberíamos ter co noso planeta. Apoiase, ademais, nunha profunda insolidariedade norte sur; ao ser o norte opulento quen o desfruta e o Sur empobrecido quen padece as súas consecuencias negativas. O CONSUMISMO é unha das principais prácticas capitalista que nos ten levando á EMERXENCIA CLIMÁTICA, pois a fabricación e distribución de calquera produto supón consumo de enerxía e polo tanto emisión de CO2 á atmosfera.

A decoración do Nadal así como a publicidade destas datas están feitas por e para fomentar o consumismo. O período do Black friday e Nadal son as datas nas que máis se consume de xeito irracional do ano, e encarna un comportamento social enfermizo coas persoas, co medio ambiente e o clima. Este consumo innecesario non está pensado para cubrir as necesidades das persoas, para levar unha vida plena e digna. É unha consecuencia do actual modelo económico baseado na acumulación de riqueza mediante o fomento do consumo non necesario. Vivir baixo este modelo económico significa vivir baixo un modelo que non ten en conta a vida das persoas, os animais e o planeta. Foméntase que consumamos de forma desproporcionada e irracional o que provoca o malgasto e fin dos recursos do planeta, xerando inmensas cantidades de residuos que contaminan os mares, a terra, o aire.

As luces de Nadal de Vigo son un exemplo máis de perpetuación desta situación. Crear unha atmosfera agradable para que as persoas merquemos compulsivamente obxectos que non precisamos ten a finalidade de perpetuar un sistema económico que se paga co prezo da destrución do planeta e de nós mesmas.

Entendemos, ademais, que as decoracións de Nadal supoñen un gasto enorme de cartos, para as arcas municipais. Vigo non é unha excepción. Unha cidade pequena como esta debería empregar estes cartos en fomentar comportamentos e actitudes de solidariedade veciñal, de respecto ao medio ambiente e sobre todo de loita contra a mudanza climática, pois unha vez que por parte do Concello de Vigo se ten aprobado a EMERXENCIA CLIMÁTICA compre que a mesma non sexa unha simple declaración baleira de contido, sen esforzo económico e de comportamento individual e colectivo, e responda á responsabilidade que se espera dos nosos representantes.