A Asociación Pola Defensa da Ría denuncia as actitudes antidemocráticas dos traballadores de ENCE

Publicado por o día 02/05/2019 na sección de APDR,Galicia,Medio Ambiente,Pontevedra,Social

A Asociación Pola Defensa da Ría denuncia as actitudes antidemocráticas dos traballadores de ENCE

Diante das declaracións realizadas polos representantes sindicais dos traballadores da empresa ENCE ao respecto dos “actos vandálicos” que se produciron na tarde-noite da manifestación organizada na defensa dos interese do capital financeiro de ENCE polos comités de empresa, o PP e CC.OO. e durante a campaña de propaganda da amentada manifestación, declaracións nas que se desmarcan dos citados feitos por non consideralos aceptábeis, e nas que afirman que “todas as súas actuacións caracterízanse polo seu civismo e pacifismo”, desde a Asociación Pola Defensa da Ría queremos puntualizar o seguinte:

1º.- resulta difícil pensar que a autoría de moitos deses feitos aos que se refiren non estea relacionada de forma directa ou indirecta cos sectores que defenden os intereses de ENCE, os mesmos que organizaron a manifestación.

2º.- que, en calquera caso, non é certo que todas as súas actuacións respondan aos criterios de civismo e pacifismo que din defender; e unha proba evidente desta falta de civismo e do seu comportamento antidemocrático, é a súa recente actuación no pleno do Concello de Poio, no que demostraron tamén unha absoluta falta de educación e respecto fronte a quen defenden a legalidade. E tampouco demostraron unha actitude cívica e pacífica ao teren anulado parte das pancartas instaladas pola APDR en contra da prórroga a ENCE, pancartas que foron atadas con bridas sobre elas mesmas para evitar que se poida ler a súa mensaxe, un feito que realizaron tanto no momento en que colocaron as súas pancartas, que chamaban á manifestación, como no proceso de retirada das mesmas.

En calquera caso, apelamos a ese espírito cívico que din defender e do que pretenden facer bandeira, para que reparen o dano ocasionado á nosa asociación volvendo a deixar as nosas pancartas tal como estaban.