A CIG considera ilegal o acordo asinado en CTAG para o persoal que presta servizo en proxectos de PSA

A central denuncia que a suspensión da actividade faise con cargo ás vacacións dos traballadores/as
Publicado por o día 25/04/2020 na sección de CIG,Coronavirus,Empresas,Galicia,Motor,Sindicatos,Vigo

A CIG considera ilegal o acordo asinado en CTAG para o persoal que presta servizo en proxectos de PSA

O Centro Tecnolóxico de Automoción de Galicia (CTAG), vén de asinar, xunto con CCOO e Independentes de CTAG, un acordo para xestionar a suspensión da actividade do persoal que presta servizos para proxectos de PSA con cargo ás vacacións dos traballadores/as. A CIG rexeitou a medida ao considerala ilegal e presentou unha denuncia diante da Inspección de Traballo.

Dende a central sindical explican que tras a declaración do estado de alarma por emerxencia sanitaria a compañía xestionou a situación do persoal de acordo co comité de empresa mediante teletraballo (opción recomendada polo Goberno central como prioritaria); non obstante, o pasado día 12 “traspasou os límites legais co acordo asinado pola dirección coas forzas sindicais antes mencionadas, acordo ao que nós nos opuxemos”.

Este acordo obriga ao persoal que presta o servizo en proxectos de PSA a compensar coas súas vacacións de 2020 a falta de actividade no centro de PSA, “cando que as vacacións son un dereito persoal fundamental do traballador/a”.

Diante disto, a CIG rexeitou asinar o acordo pola “clara ilegalidade” das medidas recollidas no documento, ao tempo que lembra que durante a negociación os delegados/as achegaron distintas alternativas, “pero dende o primeiro momento o acordo baseouse no uso obrigatorio e ilegal dos días de vacacións”.

Tras a sinatura do acordo a CIG presentou a correspondente denuncia diante da Inspección de Traballo, “pero por se non fose suficiente a empresa e os sindicatos CCOO e IdeC volven vulnerar a legalidade e asinan unha prórroga do acordo por 15 días máis”.

Abusos e ilegalidades

Desta forma, os traballadores/as perden máis días de vacacións e acumulan unha débeda de horas coa empresa, que pode ser superior ás 200 nalgúns casos, hipotecando o futuro do persoal afectado, e máis aínda no caso dos contratos eventuais, que non terán tempo material para a devolución destas horas antes da conclusión do contrato.

Os delegados/as da central sindical rexeitan que se asine unha prórroga deste acordo mentres non se volva á legalidade e se tomen medidas que protexan os traballadores/as prexudicados/as.

Dende o comezo da crise provocada pola Covid-19 a CIG está a advertir que as empresas cometen todo tipo de abusos e ilegalidades na xestión laboral, conculcando os dereitos dos seus cadros de persoal. “O que máis sorprende é que haxa outras organizacións sindicais dispostas a colaborar con estes abusos e ilegalidades cometidas polas empresas”, rematan.