A conselleira de Educación reunise hoxe con catro organizacións sindicais

Para a conselleira, no actual momento de incerteza política e económica a nivel estatal sería unha grande irresponsabilidade facer cambios neste aspecto
Publicado por o día 06/11/2019 na sección de Educación

A conselleira de Educación reunise hoxe con catro organizacións sindicais

A conselleira de Educación, Universidade e Formación Profesional, Carmen Pomar, reuniuse hoxe con representantes das organizacións sindicais Confederación Intersindical Galega (CIG-Ensino), Comisións Obreiras (CC.OO. Ensino), ANPE e Federación de Traballadores do Ensino de UGT (FETE-UGT). O encontro responde á demanda sindical de abordar a redución do número de horas lectivas que imparte o profesorado galego, que, con 25 horas en Primaria e 20 en Secundaria, coincide co da maioría de comunidades autónomas do Estado.

Carmen Pomar explicou que, no actual contexto de incerteza política e económica a nivel estatal, modificar o horario lectivo sería unha irresponsabilidade, máis tendo en conta que a mesma lei que recomenda a redución do horario lectivo apunta que o Estado facilitará as condicións orzamentarias para que se leve a cabo polas comunidades autónomas. Polo tanto, antes de realizar calquera modificación, Galicia precisa un compromiso firme e claro do Goberno central dun transvase de fondos que permita facerlle fronte á contratación de máis profesorado.

A conselleira de Educación recordou que o seu departamento está comprometido coa estabilidade dos docentes e coa mellora das súas condicións de traballo. Non en balde, no ano 2020 está previsto convocar a Oferta Pública de Emprego con máis prazas nos últimos anos, co fin de continuar baixando a porcentaxe de interinidade, que xa é a menor de España. Ademais, os orzamentos 2020 permitirán dar cumprimento case completo ao acordo de homologación salarial asinado coas organizacións sindicais, que supón un incremento total de 1.260 €/ano, o que permite que as retribucións dos docentes galegos estean por encima da media dos doutras comunidades autónomas.

Por outra banda Pomar salientou que as contas do 2020 inclúen 7,2 millóns de euros para formación xeral e específica do profesorado, a cifra máis alta de toda a serie histórica neste concepto.

A conselleira de Educación insistiu na pertinencia de abordar cuestións como a do horario lectivo do profesorado, entre outras, no seo dun Pacto Educativo a nivel estatal que quedou en suspenso pola falta de capacidade negociadora do PSOE na oposición e que, na súa etapa de goberno, non volveron convocar.