A consulta telefónica do Sergas incrementa preto dun 13% a súa actividade e consolida a súa aceptación por parte dos usuarios

Máis de dous millóns de citas corresponden ás especialidades de médico de familia e pediatría
Por o 29/03/2018 | Sección: Sanidad
A consulta telefónica do Sergas incrementa preto dun 13% a súa actividade e consolida a súa aceptación por parte dos usuarios

As consultas telefónicas en atención primaria ascenderon a un total de 2.557.567 durante o ano 2017, o que supón un incremento do 12,95% con respecto ao ano 2016, con 331.218 máis. Esta modalidade de consulta, que escolle o propio paciente, tivo unha importante acollida entre os usuarios do Servizo Galego de Saúde tal e como reflicten o número de solicitudes en aumento.

O paciente, de forma voluntaria e no momento no que solicita a consulta, elixe a opción de ser atendido de forma presencial ou a través do teléfono, coas mesmas características de tempo e distribución en calquera das dúas modalidades.

Por especialidades, durante o ano 2017, solicitáronse un total de 2.004.134 citas telefónicas para os médicos de familia, o que representa un 13,53% do total de citas atendidas en Atención Primaria (telefónicas e presenciais). Para pediatría solicitáronse 177.655, e 306.934 para enfermería.

(*) porcentaxe sobre o total de citas (presenciais e telefónicas) no 2017 en Atención Primaria

A iniciativa comezou en decembro de 2013 coa especialidade de medicina de familia e, en marzo de 2014, ampliouse ás outras categorías profesionais, que iniciaron tamén esta modalidade de consulta. Dende o inicio, todas as categorías aumentaron porcentualmente o número de citas solicitadas.

A cita prevé a posibilidade de que o paciente pase a ser atendido de forma presencial, opción que se leva a cabo cando é necesario e cunha xestión desa cita de maneira máis áxil.

Aposta por calidade e seguridade

Esta modalidade de atención é unha aposta do Servizo Galego de Saúde por ofertar aos usuarios novos modelos de consultas que acheguen os profesionais á cidadanía, garantindo en todo momento ao paciente seguridade e calidade asistencial. Ao mesmo tempo, reducen desprazamentos aos centros de saúde e evitan esperas innecesarias, co conseguinte aforro de tempo, e de custe económico para os pacientes, axudando a mellorar a conciliación da súa vida familiar e laboral e do seu entorno.

O profesional ponse en contacto co paciente a través do número de contacto facilitado, na data acordada; tras a avaliación asistencial, rexistra os datos obtidos na súa historia clínica. A consulta telefónica tamén permite ao profesional a prescrición directa a través da receita electrónica. Así mesmo, se o profesional, durante a consulta telefónica, considera que non é posible este tipo de atención, facilitará ao paciente unha cita presencial á maior brevidade posible.

Para o departamento que dirixe Jesús Vázquez Almuiña, estes programas poden levarse a cabo grazas á implicación de todos os profesionais e aos avances nas ferramentas informáticas das que dispón o Sergas, que permiten entrelazar os sistemas de citación coa historia clínica electrónica e de prescrición, pechando o círculo da comunicación cun medio ao alcance de todos os usuarios como é o teléfono.