A Delegación Territorial da Xunta acolleu a presentación da Mostra do Aceite de Quiroga, que se celebra o vindeiro domingo

A festa está declarada de interese turístico de Galicia e, como tal, pode acceder a unha axuda do Goberno galego de 7.500 euros
Publicado por o día 09/05/2019 na sección de Galicia,Lugo

A Delegación Territorial da Xunta acolleu a presentación da Mostra do Aceite de Quiroga, que se celebra o vindeiro domingo

A Delegación Territorial da Xunta en Lugo acolleu hoxe a presentación da XIX edición da Mostra do Aceite de Quiroga, que se celebrará o vindeiro domingo día 12. No acto participaron o delegado territorial, José Manuel Balseiro; o alcalde do concello, Julio Álvarez; o deputado provincial Eduardo Vidal e o concelleiro José Luís Rivera.

Os participantes coincidiron en sinalar que a produción de aceite é unha aposta de futuro para a dinamización socioeconómica de Quiroga, onde se conservan dúas variedades autóctonas de oliva únicas no mundo, a brava e a mansa, que logran un produto de calidade excelente.

A mostra quere difundir este produto e facer honor á súa historia, xa que o cultivo dos olivos ten unha tradición centenaria no municipio. Está declarada Festa de Interese Turístico de Galicia e, como tal, pode recibir da Xunta unha achega económica de 7.500 euros -6.000 euros de axuda directa e 1.500 euros a través dun convenio da Consellería de Cultura e Turismo con Abanca-.

O principal atractivo da festa é a demostración da forma tradicional de elaboración do aceite nunha almazara romana, o muíño de Bendilló, datado entre os séculos I e II da nosa era. Está situado a escasos metros da estrada N-120, na pista que conduce á aldea do mesmo nome, e forma un interesante conxunto arquitectónico xunto coa capela de San Xoán das Farrapas.

Na feira hai tamén outros produtos de alimentación e artesanía típicos da bisbarra, e unha cata de aceites comentada por persoal especializado. Ademais, os visitantes terán a oportunidade de admirar a paisaxe do primeiro Xeoparque Mundial recoñecido pola Unesco en Galicia, segundo se reiterou na presentación.

Os actos comezarán ás 11,30 horas coa posta en funcionamento do muíño, e a demostración continuará durante todo o día. Como prólogo á mostra, mañá venres ás 19,00 horas, haberá unha cata dos aceites inscritos no Museo Etnográfico Municipal de Quiroga.

Comentar noticia

Your email address will not be published.