A Deputación de Pontevedra concede novas subvencións dentro do Plan Concellos 2018

Na última liña de axudas atópanse obras tan importantes como o Comedor de Rosalía de Castro ou o acondicionamento da Escola Infantil do Monte da Vila para ludoteca de maiores, entre outras
Publicado por o día 04/11/2018 na sección de Galicia,O Grove

A Deputación de Pontevedra concede novas subvencións dentro do Plan Concellos 2018

A Deputación de Pontevedra ven de comunicar a concesión de catro novas axudas dentro do Plan Concellos 2018. Dentro das obras solicitadas polo Concello tense obtido o visto bo definitivo a axudas que supoñen obras completas, como é o caso dos vestiarios para as pistas de padel, ou a parte municipal de outras actuacións como a referida ao Comedor do CEIP Rosalía de Castro.

Dun xeito máis concreto, a Deputación facilitará 30.000 euros para a construción dun comedor no Colexio Rosalía de Castro. Esa contía corresponde á parte municipal desa obra, xa que os 36.636,30 euros restantes do custo total da mesma serán aportados pola Xunta de Galicia. Isto permite contar cunha infraestrutura moi demandada polos pais e nais deste colexio e que, de feito, se agarda que poida estar dispoñible en breve.

Tamén se ten concedido unha axuda de 47.876,68 euros para a construción duns vestiarios nas novas pistas de padel municipal. Trátase dunha mellora que non estaba prevista inicialmente, pero cuxa necesidade quedou patente ante a grande demanda que teñen as instalacións e que fan complexo compartir este servizo co pavillón municipal, tamén con alto uso.

Outra das obras fundamentais é a adecuación da Escola Infantil do Monte da Vila para o seu uso como ludoteca de maiores, dentro da dinámica aplicada no programa Vellos Tempos. Trátase dunha actuación que terá un custo de 56.007,14 euros dos cales 43.623,75 euros serán aportados pola Deputación de Pontevedra, mentres que os 12.383,39 euros restantes proceden de fondos propios do Concello.

A cuarta das actuacións aprobadas é precisamente a relativa á accesibilidade da Casa da Cultura, sendo este o último dos edificios públicos que tiña pendente cumprir os requisitos de accesibilidade que se tiñan comprometido por parte do Goberno Local. A actuación suporá un investimento de 35.605.18 euros sufragados na súa totalidade polo Plan Concellos da Deputación de Pontevedra.

Dende o Concello do Grove séguese traballando e máis proxectos dentro deste mesmo plan ao tempo que se valora moi positivamente o bo ritmo e a importancia que teñen os recursos aportados de xeito obxectivo e directo pola Deputación para a continúa mellora do Grove.