A Deputación de Pontevedra inviste 618.074,23 euros na adpatación dos 9 puntos limpos da provincia

Carmela Silva destaca que as actuacións de adaptación dos puntos limpos á normativa española e europea estarán dispoñibles no primeiro trimestre de 2019
Publicado por o día 03/09/2019 na sección de Deputación de Pontevedra

A Deputación de Pontevedra inviste 618.074,23 euros na adpatación dos 9 puntos limpos da provincia

A Xunta de Goberno Provincial tomou hoxe coñecemento do inicio dos expedientes. A presidenta da Deputación, Carmela Silva, destacou que agarda que, unha vez rematados os trámites de contratación das obras e as subministracións necesarias, os puntos limpos estean plenamente operativos no primeiro trimestre de 2019.

Culminará deste xeito un proceso que comezou coa captación dos fondos europeos FEDER a través da primeira convocatoria do Programa de Cooperación Transfronteiriza POCTEP 2014-2020. Naceu así o proxecto Estraee (Estratexia Sostible para a Xestión de Aparellos Eléctricos e Electrónicos) do que se están a beneficiar 9 puntos limpos doutros tantos concellos da provincia de Pontevedra, xunto con outros 9 situados en territorio portugués.

O orzamento total de licitación dos contratos de subministración e obras para a adaptación dos 9 puntos limpos da provincia incluídos é de 618.074,23 euros, que se reparten entre os 238.275 euros para as subministracións e outros 379.799,23 euros para as obras de reforma. A Deputación achega directamente 154.518,56 euros, o 25% do orzamento global.

A institución provincial investirá 67.891,40 euros na adaptación dos puntos limpos de Bueu e A Lama, 28.604,08 euros na Guarda, 55.597,24 euros en Gondomar e Nigrán, 86.528,82 euros en Vilagarcía de Arousa e Meaño, 26.596,26 euros en Silleda e 48.665,59 euros na adaptación do punto limpo de Ponteareas, co obxectivo de acondicionar todos eles para a recollida e xestión dos Residuos Eléctricos e Electrónicos (RAEE). Unha iniciativa que permitirá o cumprimento da normativa europea e española para o tratamento do “lixo tecnolóxico”.

Bueu e A Lama

Nos “ecocentros” de Bueu e A Lama é preciso instalar sistemas de vixilancia, de control de accesos ao almacén, de control de accesos de vehículos, gaiolas e estanterías, transpaletas (máquinas para o movemento de palés) e, finalmente, subministración de equipos informáticos.

No que atinxe ás obras, no punto limpo da Mancomunidade do Morrazo, en Bueu, está previsto construír un almacén para RAEE e reutilización, que estará totalmente cerrado, con soleira impermeabilizada e arqueta cega. Instalaremos iluminación no almacén e tamén protección contra incendios e paneis indicativos.  A previsión de investimento é de 39.287,32 euros e o prazo de execución de dous meses, unha vez adxudicado o contrato.

En A Lama construirase no nivel superior un edificio para a reutilización dos residuos, instalarase iluminación no almacén e proveerase de sistema de protección contra incendios e paneis indicativos. O custo é de 28.604,08 euros e o prazo de execución tamén é de dous meses.

A Guarda

No caso concreto de A Guarda é necesario subministrar sistemas de vixilancia, de control de accesos ao almacén, de control de accesos de vehículos, gaiolas e estanterías, transpaletas (máquinas para o movemento de palés) e, finalmente, subministración de equipos informáticos.

No que atinxe ás obras neste “ecocentro”, construirase no nivel superior un edificio para a reutilización dos residuos, instalarase iluminación no almacén e proveerase de sistema de protección contra incendios e paneis indicativos. A empresa que resulte adxudicataria das obras disporá dun prazo de 2 meses.

Gondomar e Nigrán

Nos “ecocentros” de Gondomar é Nigrán é preciso  subministrar sistemas de vixilancia, de control de accesos ao almacén, de control de accesos de vehículos, gaiolas e estanterías, transpaletas (máquinas para o movemento de palés) e, finalmente, subministración de equipos informáticos .

No que atinxe ás obras, no punto limpo de Gondomar vaise construír un almacén propio de RAEE, totalmente pechado, con soleira impermeabilizada e arqueta para recollida de posibles derrames. No nivel inferior haberá un edificio para almacén e reutilización. Instalarase iluminación e tamén de sistema de protección contra incendios e paneis indicativos. O orzamento concreto para este punto limpo é de 35.637,19 euros.

En Nigrán obrarase para dotalo de nova iluminación e colocación de portas corredoiras con peche de seguridade. Construirase un edificio no nivel superior, apegado ao existente, para reutilización que poderá ser utilizado tamén como almacén de RAEE. Tamén será dotado de sistema de protección antiincendios e paneis indicativos. O custo en Nigrán ascende a 19.960,05 euros. O prazo de execución en ámbalas dúas obras será, unha vez adxudicadas, de dous meses.

Vilagarcía de Arousa e Meaño

Tanto en Vilagarcía como en Meaño é necesario subministrar sistemas de vixilancia, de control de accesos ao almacén, de control de accesos de vehículos, gaiolas e estanterías, transpaletas (máquinas para o movemento de palés) e, finalmente, subministración de equipos informáticos.

No que atinxe ás obras no “ecocentro” de Vilagarcía, cun custo de 71.965,41 euros, vaise demoler a soleira existente para mellorar a drenaxe de augas pluviais; instalarase de iluminación no almacén e construirase un edificio sobre o actual, duns 207 metros cadrados, co obxectivo de aumentar a capacidade de almacenaxe e poder levar a cabo as labores de reutilización. Finalmente, será dotado dun sistema de protección contra incendios e paneis indicativos.

No caso de Meaño vaise demoler a soleira para mellorar a drenaxe das augas pluviais. Colocarase iluminación no almacén, modificaranse as portas de acceso e dotarase de sistema de protección de incendios. O custo previsto é de 14.562,42 euros.

A empresa que resulte adxudicataria das obras dispón dun prazo de tres meses para a execución das obras en Vilagarcía, mentres que disporá de 1,5 meses en Meaño.

Silleda

No caso concreto de Silleda é necesario subministrar sistemas de vixilancia, de control de accesos ao almacén, de control de accesos de vehículos, gaiolas e estanterías, transpaletas (máquinas para o movemento de palés) e, finalmente, subministración de equipos informáticos.

No que atinxe ás obras, no punto limpo silledense hai que demoler a soleira existente para mellorar a drenaxe de augas pluviais. Ademais, vaise instalar iluminación no almacén e construírse outro almacén, apegado ao existente, para a reutilización e mesmo utilizalo como almacén de RAEE en caso de saturación. Finalmente precísase un sistema de protección contra incendios e paneis indicativos. O custo de todas estas actuacións é de 26.596,26 euros e o prazo de execución, trala adxudicación do contrato, será de dous meses.

Ponteareas

No caso concreto de Ponteareas é necesario subministrar sistemas de vixilancia, de control de accesos ao almacén, de control de accesos de vehículos, gaiolas e estanterías, transpaletas (máquinas para o movemento de palés) e, finalmente, subministración de equipos informáticos.

No que atinxe ás obras deste “ecocentro” vanse construír dous almacéns independentes para realizar o almacenaxe de RAEE (3o metros cadrados) e para a reutilización (28 metros cadrados). Tamén vaise iluminar o almacén e instalar un sistema de protección contra incendios e paneis indicativos. O custo previsto destas obras é de 48.665,59 euros e o prazo de execución, trala adxudicación do contrato, será de dous meses.

A Deputación de Pontevedra conseguiu os fondos FEDER e asumiu o liderado do proxecto Estraee, xunto con outros tres socios españois (Revertia, ERP España e Energy Lab) e dous portugueses (ERP Portugal e Liport).

Os RAEE, cuxo volume crece a un ritmo de entre un 18% e un 26% anual, supoñen xa 50 millóns de toneladas anuais no mundo, das que preto dun millón se producen en España. Trátase de residuos altamente contaminantes, dado que inclúen elementos que causan graves prexuízos ao medio ambiente.