Publicado por 
O Goberno de Carmela Silva aprobou a adxudicación das obras de reposición do firme e mellora da seguridade viaria na estrada provincial EP 5003, que transcorre polos termos municipais da Cañiza e Arbo e ten unha lonxitude total de 12,3 quilómetros. En total, a Deputación de Pontevedra vai investir máis de 820.000 euros na mellora da seguridade viaria deste tramo, que inclúe a reordenación da explanada nas inmediacións do colexio de Valeixe, no concello da Cañiza.
As obras adxudicáronse a Construcciones, Obras y Viales, S. A., cun prezo de licitación de 824.219,85 euros e un prazo de execución das obras de seis meses desde a formalización do contrato. Máis polo miúdo, os traballos a realizar na EP-5003 consistirán no fresado e reposición de firme en varios treitos, que constitúen a maior parte da estrada, e nun dos tramos executarase unha capa de microaglomerado en frío. Por outra banda, revisarase a sinalización vertical de velocidade, elevaranse varios dos pasos de peóns existentes e estreitaranse os carrís na proximidade dos pasos de peóns, coa finalidade de calmar o tráfico.
Ademais, reordenarase a explanada existente nas inmediacións do colexio de Valeixe, no concello da Cañiza, para mellorar a seguridade da zona. Deste xeito, configurarase unha senda peonil, unha zona de estacionamento de coches e outra para autobuses e executarase unha beirarrúa na entrada do centro, que dará acceso a un dos pasos de peóns sobreelevados e permitirá unha maior seguridade na entrada e saída do colexio. Tamén, desde o colexio e ata o punto quilométrico 8+975, farase unha redistribución dos espazos, deixando carrís de tres metros de ancho e a beiravía esquerda dun metro, de xeito que quede unha senda pola marxe dereita para favorecer o tránsito peonil.
Este proxecto forma parte dun paquete de diversas melloras nas estradas provinciais en cinco concellos (A Cañiza, Arbo, A Guarda, A Lama e O Grove), que a Deputación aprobou o pasado ano por un montante global de dous millóns de euros. En liñas xerais, os traballos que se van acometer van destinados a consolidar o modelo de estradas que ten en marcha a institución provincial para recuperar a seguridade viaria, a mobilidade peonil e os espazos públicos para a cidadanía, no marco do modelo de mobilidade impulsado pola Deputación de Pontevedra.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.
