A Deputación responde á histórica demanda veciñal de mellora de seguridade viaria no tramo do Viso na EP-2901, en Redondela

O proxecto xa está en licitación e supoñerá unha solución rápida e eficaz mediante a creación de itinerarios peonís
Publicado por o día 14/05/2020 na sección de Deputación de Pontevedra,Galicia,Redondela

A Deputación responde á histórica demanda veciñal de mellora de seguridade viaria no tramo do Viso na EP-2901, en Redondela

A Deputación de Pontevedra sacou a licitación o esperado proxecto de mellora da seguridade viaria na EP-2901, en Redondela, no tramo entre Cesantes e Alxán que pasa polo Viso. Esta actuación dálle resposta a unha demanda histórica da veciñanza que vive neste núcleo de poboación. As obras teñen un orzamento de 142.784,71 euros e o prazo de licitación estará aberto ata o 3 de xuño.

O proxecto, que vai na liña do decálogo de criterios establecidos pola Deputación de Pontevedra en canto á mobilidade segura, ten como principal obxectivo crear itinerarios peonís en todo o ámbito da actuación co método da cuneta tendida. En definitiva, a actuación segue o modelo provincial baseado nos principios de mobilidade segura, accesibilidade e priorización dos dereitos das persoas.

Con este proxecto trataranse as marxes da estrada e substituiranse as cunetas existentes por cunetas transitables de formigón ou pavimento de soleira de formigón. Ademais, instalaranse unha tubaxe de formigón de 400 mm diámetro para augas pluviais e arquetas de formigón con reixa. Tamén se executarán cinco redutores físicos de velocidade ao longo do treito da estrada.

Comentar noticia

Your email address will not be published.