A estadía media nos establecementos turísticos galegos acada no primeiro tramo do trimestre a cifra máis elevada dos últimos cinco anos

Segundo as cifras do Instituto Nacional de Estatística (INE) aumentou case un 3% o tempo que os viaxeiros permanecen na Comunidade
Publicado por o día 07/05/2019 na sección de Turismo

A estadía media nos establecementos turísticos galegos acada no primeiro tramo do trimestre a cifra máis elevada dos últimos cinco anos

A estadía media nos establecementos de aloxamento galegos medrou no primeiro trimestre un 2,3%, situándose o tempo que os viaxeiros permanecen na Comunidade na cifra máis alta dos últimos cinco anos.

Así se desprende dos últimos datos publicados polo Instituto Nacional de Estatística (INE) que revelan que nos tres primeiros meses visitaron Galicia máis de 614.000 viaxeiros, que realizaron máis de 1,1 millóns de pernoitas, o que supón un crecemento da demanda turística nun 18% no último lustro.

Durante os tres primeiros meses deste ano o turismo internacional medrou preto dun 2% na totalidade dos aloxamentos regrados, incluíndo hoteis, pensións, campings, establecementos de turismo rural e apartamentos turísticos. É o quinto ano consecutivo no que se rexistra un crecemento do turismo internacional en Galicia neste primeiro trimestre situando o nivel de 2019 en máis de 218.000 noites, a cifra máis alta en 11 exercicios.

No que se refire só ao mes de marzo, tamén se rexistrou un aumento no tempo que os viaxeiros permanecen na Comunidade galega malia o efecto de Semana Santa, que nesta ocasión se celebrou en abril. A cifra da estadía media medrou case o 4% só nese mes. Tamén se rexistrou un aumento na demanda turística internacional, neste caso en máis dun 7% na totalidade dos aloxamentos regrados.

Comentar noticia

Your email address will not be published.