A Residencia de Estudantes de Afundación abre o curso 2020-2021 con todas as prazas cubertas e un coidado protocolo sanitario

Un ambicioso protocolo sanitario ou a ampliación de horarios para o establecemento de quendas en actividades comúns son dúas das novas iniciativas postas en marcha para este curso
Publicado por o día 17/08/2020 na sección de Educación,Formación

A Residencia de Estudantes de Afundación abre o curso 2020-2021 con todas as prazas cubertas e un coidado protocolo sanitario

A Residencia de Estudantes de Pontevedra de Afundación, a Obra Social de ABANCA, comezará o novo curso 2020-2021 con todas as súas prazas cubertas e con lista de agarda. As instalacións contan este ano con 120 prazas, que acollerán os estudantes desde o vindeiro 15 de setembro ata a finalización do curso académico, o 15 de xuño de 2021. As novas circunstancias, a raíz das medidas necesarias ante a COVID-19, motivaron a implantación dun novo protocolo sanitario enfocado a previr e a conter os riscos de contaxio. Así, por exemplo, establecéronse franxas horarias máis amplas para o comedor, co propósito de favorecer a distribución por quendas, fixouse o uso obrigatorio de máscaras en todas as zonas comúns e habilitáronse puntos estratéxicos de hixiene e desinfección. Así mesmo, destinouse unha área específica de illamento en casos de detección de coronavirus, en consonancia coas medidas que desde a Consellería de Educación se trasladou aos centros no protocolo de actuación para este curso 2020-2021. Desta forma, a Residencia de Estudantes Afundación proporciona un apoio fundamental para seguir dinamizando a necesaria vida académica, ao tempo que vela polo cumprimento das normas imprescindibles para minimizar o impacto da COVID-19.

A Residencia de Estudantes Afundación de Pontevedra, inaugurada en 1969, aloxou desde a súa apertura a máis de 6000 mozas e mozos das facultades e escolas universitarias do campus de Pontevedra, centros de formación profesional e estudantes doutros países que cursan actualmente algún programa en IESIDE (procedentes de Colombia, Guatemala, Arxentina, Perú, O Salvador ou China, entre outros). Está situada no centro da cidade (avenida de Vigo, 21), nun edificio de cinco plantas; as súas instalacións compleméntanse cun edificio anexo de dúas plantas que suman unha superficie construída de máis de 5000 m². Nos meses de verán proporciona aloxamento a residentes que preparan os seus exames de setembro, clubs deportivos, campamentos de verán ou asociacións sen ánimo de lucro, entre outros. Un total de 7500 desde a súa inauguración. Por outra banda, no contexto das liñas estratéxicas de Afundación, a Obra Social de ABANCA, desde este centro promóvense todo tipo de actividades que complementan a formación cultural, científica e deportiva dos estudantes.