A secretaría xeral de administración dixital sitúa á Deputación de Pontevedra na terceira de todo o estado que máis facilita os trámites á cidadanía

Segundo o Goberno de España, Pontevedra é a terceira deputación que máis custes de tempo e cartos aforra á cidadanía soamente superada polas de Barcelona e Bizkaia
Por o 21/05/2019 | Sección: Deputación de Pontevedra
A secretaría xeral de administración dixital sitúa á Deputación de Pontevedra na terceira de todo o estado que máis facilita os trámites á cidadanía

A presidenta da Deputación de Pontevedra, Carmela Silva, mostrou a súa satisfacción ante os datos da Secretaría Xeral de Administración Dixital do Goberno de España que confirman que a institución tense convertido “na terceira deputación de todo o Estado que máis facilita os trámites á cidadanía, na terceira que máis custes de tempo e cartos aforra á cidadanía a través da administración electrónica”. Silva amosou a súa ledicia polos resultados da Secretaria do Estado xa que soamente superan a Pontevedra as Deputacións de Barcelona e Bizkaia.

“As novas tecnoloxías están a facilitar a relación entre a cidadanía e as administracións públicas” xa que grazas a elas “as administracións poden compartir documentación, intercambiar datos e información, evitando que a cidadanía teña que achegar continuamente documentos”. En concreto, segundo a Secretaria Xeral de Administración Dixital do Goberno, a Deputación de Pontevedra xestionou entre xaneiro e abril deste ano 21.279 transmisións de datos e documentos fronte aos 5.239 do ano 2018, un 306% máis. Amais estes documentos, xestionados directamente pola Deputación de Pontevedra dende xaneiro e abril, supoñen un aforro para a cidadanía en tempo e recursos económicos de 100.000 euros.

“Fai catro anos, cando chegamos á Deputación esta era unha administración doutro século – destacou a presidenta- e foi este goberno o que puxo en marcha unha revolución tecnolóxica agora recoñecida pola Secretaría do Estado”. Neste eido, o proceso de modernización na administración provincial pontevedresa está a permitir que a cidadanía non teña que achegar certa documentación coas súas solicitudes como a relativa á consulta da identidade (DNI), residencia, vida laboral ou os certificados de estar ao corrente de pagos coa Axencia Tributaria. “É a propia administración quen, coa autorización expresa da cidadanía, se encarga de buscar a documentación mediante o cruce de datos con outras administracións, facilitando así as xestións e aforrando custes e tempos para a cidadanía e axilizando a tramitación dos procedementos para a administración”, destacou Carmela Silva.

 

Comentar noticia

Your email address will not be published.