A Xunta activa as ‘paradas seguras’ en horario nocturno nos servizos de autobús interurbano en 85 concellos galegos

O Goberno galego trasladoulle este protocolo ás empresas concesionarias para que poidan poñer xa en marcha estas paradas, adiantándose así á entrada en vigor en agosto do Plan de Transporte Público de Galicia
Publicado por o día 18/03/2019 na sección de Galicia

A Xunta activa as ‘paradas seguras’ en horario nocturno nos servizos de autobús interurbano en 85 concellos galegos

A Xunta activa as paradas seguras en horario nocturno nos servizos de autobús interurbano prestados en 85 concellos galegos.

O Plan de transporte público de Galicia, que comezará a funcionar o vindeiro mes de agosto, permitirá a posta en marcha destas paradas en horario nocturno en case 2.000 liñas de autobús de Galicia.

Non obstante, mentres non entran en vigor as novas concesións, o Goberno galego xa lles trasladou unha proposta de protocolo ás empresas concesionarias para que poidan poñer en marcha xa esta iniciativa. Así, unhas oito empresas xa comunicaron a adhesión a este protocolo e trasladaron que teñen servizos na franxa comprendida entre as 22,00 e as 07,00 horas.

Esta medida contempla como posibles beneficiarios ás mulleres, ás persoas maiores, aos menores que viaxen sós e aos viaxeiros con mobilidade reducida.

Ademais, o plan tamén prevé o funcionamento de varias liñas con horarios nocturnos adaptados ás quendas de determinados grandes centros de traballo.

O Goberno galego continúa a avanzar no proceso de renovación do mapa de servizos de autobús interurbano de Galicia mediante unha planificación que culminará este ano.

Esa modernización do transporte público seguirá o camiño iniciado en agosto de 2017, cando as renuncias das empresas a seguir prestando boa parte dos servizos de autobús obrigaron á Xunta a pór en marcha un novo plan de servizos temporais ata este verán, e que agora afronta unha renovación que se estenderá ao conxunto da comunidade.