A Xunta adxudica a redacción do contrato para impulsar un plan de sendas nas comarcas do Baixo Miño e do Condado

Estes itinerarios desenvolveranse nos concellos da Guarda, O Rosal, Oia, Tomiño e Tui, Mondariz, Mondariz-Balneario, As Neves, Salvaterra de Miño e Ponteareas
Publicado por o día 12/12/2020 na sección de Galicia,Xunta de Galicia

A Xunta adxudica a redacción do contrato para impulsar un plan de sendas nas comarcas do Baixo Miño e do Condado

A Consellería de Infraestruturas e Mobilidade vén de adxudicar o contrato para redactar un Plan de sendas nas comarcas do Baixo Miño e do Condado.

Este servizo adxudicouse á empresa Aquatica Ingeniería Civil, S.L. por un importe de máis de 18.000 euros.

Trátase de identificar os treitos de sendas prioritarios a executar nas marxes das estradas autonómicas ao seu paso polos concellos da Guarda, O Rosal, Oia, Tomiño e Tui, Mondariz, Mondariz-Balneario, As Neves, Salvaterra de Miño e Ponteareas.

No marco da redacción deste contrato, que opta a posible financiamento europeo con fondos Next Generation ou FEDER 21/27, consultarase aos municipios nos que se acometerán as sendas, tal como se fixo nas fases anteriores noutras comarcas.

Para o impulso destes itinerarios peonís e ciclistas, tómanse en consideración criterios como a localización das estradas con respecto a núcleos de poboación ou servizos e equipamentos. Tamén se teñen en conta as características particulares das vías, a integración ambiental ou a mobilidade alternativa actual.

No caso de cada bisbarra, realizarase un estudo inicial de identificación de posibles sendas, relacionando os focos de atracción de peóns e ciclistas cos seus puntos de xeración correspondentes. Identificaranse as sendas existentes, as planificadas e os tramos onde sería axeitado implantalas.

A continuación, avaliarase a oportunidade de executar cada treito de senda identificado, para xerarquizar a proposta de actuación en base a criterios obxectivos que determinen a eficiencia e eficacia das actuacións.

Tamén se estudará a posibilidade de incluír sendas en concellos limítrofes, cando se consideren necesarias ou dean continuidade a itinerarios das comarcas analizadas.

3ª fase do Plan de Sendas

A Xunta, con este contrato e outros para as comarcas de Noia e Barbanza, de Deza, e de Lemos e Sarria, está a impulsar a 3ª fase do Plan de Sendas de Galicia.

O Goberno galego continúa así co desenvolvemento deste plan, que na primeira fase dotou de sendas as bisbarras da Coruña, Bergantiños, Ferrol, O Salnés, Santiago, Terra Cha e Vigo e na segunda, as de Lugo, O Morrazo, Ourense e Pontevedra.

Este Plan ten como obxectivo incrementar a seguridade de peóns e ciclistas, que son os usuarios máis vulnerables das estradas. Tamén busca promover unha mobilidade máis sustentable, favorecendo modos de desprazamento menos contaminantes e alternativos á utilización do vehículo particular.

Comentar noticia

Your email address will not be published.