A Xunta aproba as expropiacións e o proxecto para executar unha nova senda peonil e ciclista no concello de Vilanova de Arousa, cun investimento de 2 M€

O proxecto define a execución dun novo itinerario en dous tramos das estradas autonómicas PO-307, no treito que une o lugar de Deiro coa ponte da Illa de Arousa, e na PO-549, desde Tarrío a Cores
Publicado por o día 30/09/2018 na sección de Xunta de Galicia

A Xunta aproba as expropiacións e o proxecto para executar unha nova senda peonil e ciclista no concello de Vilanova de Arousa, cun investimento de 2 M€

A Xunta impulsa a construción dunha senda peonil e ciclista no concello de Vilanova de Arousa, aprobando esta semana as expropiacións e o proxecto para a súa execución, a que destinará un investimento de 2 millóns de euros

A Consellería de Infraestruturas e Mobilidade ten prevista a licitación do contrato de execución desta nova senda na comarca do Salnés este mesmo ano, cun orzamento estimado para as expropiacións necesarias para executar as obras é de case 168.000 euros e o orzamento base de licitación do proxecto de construción é de máis de 1’8 millóns de euros.

Na estrada autonómica PO-549 actuarase no tramo comprendido entre o punto quilométrico 6+200 -situado en Tarrío, no punto no que finalizan as actuais beirarrúas- e o punto quilométrico 7+210, que conecta cun tramo de beirarrúa executado en 2012 pola Xunta. E xa no punto quilométrico 6+500 hai unha glorieta na intersección coa PO-307, na que conflúen as sendas proxectadas nas dúas estradas.

Neste treito construíranse sendas en formigón coloreado polas dúas marxes da estrada, que suman aproximadamente 2 quilómetros de lonxitude, cun ancho mínimo de dous metros.

Na PO-307 proxéctase a senda pola marxe esquerda da estrada. no tramo comprendido entre o punto quilométrico 0 – a glorieta de intersección coa PO-549 e coa PO-530- e o punto quilométrico 1+640, ponte da Illa de Arousa. Neste punto, o novo itinerario peonil e ciclista conecta coa senda existente na citada ponte, tamén executada polo departamento de Infraestruturas da Xunta na PO-306, compartida entre Vilanova de Arousa e a Illa de Arousa.

Neste caso, a sección tipo deste tramo de senda contará con 3 metros de ancho e se separará da calzada mediante unha cuneta de seguridade e unha banda verde.

A intervención prevé ademais a mellora das paradas de autobús, a instalación dos sistemas de recollida das augas de drenaxe e a colocación das canalización que permitan nun futuro a instalación de redes de telecomunicacións ou electricidade.

Esta semana o departamento de Infraestruturas da Xunta acordou o expediente de información pública, e definitivamente, o proxecto de construción deste novo itinerario mixto na estrada autonómica PO-307, aprobando tamén o Goberno galego a declaración de utilidade pública e disposición da urxente ocupación dos bens e dereitos necesarios para a súa execución.

Plan de sendas de Galicia na comarca do Salnés

Esta actuación do Goberno galego está incluída no Plan de Sendas de Galicia, no “Estudo de Fomento da mobilidade sostible: Sendas peonís e/ou ciclistas na comarca do Salnés”, cofinanciadas con Fondos FEDER 2014/2020.

Como resultado deste estudo o departamento de Infraestruturas da Xunta identificou como prioritarios oito treitos de actuación na comarca, que se desenvolven mediante 7 proxectos de sendas peonís e ciclistas na comarca do Salnés, nas que prevé a execución de 21 quilómetros de itinerarios, e un investimento aproximado de 12,2 millóns de euros.

Neste intre a consellería de Infraestruturas ten rematado o itinerario peonil e ciclista na PO-306 entre Vilanova de Arousa e A Illa de Arousa, e na estrada PO-308 están en servizo xa os tramos de senda entre a Praia da Lanzada e Soutullo, e dende Soutullo ata Major, no Concello de Sanxenxo. E está a ultimar tamén en Sanxenxo a redacción do proxecto que dará continuidade a esta infraestrutura ata Portonovo.

Tamén se acaba de iniciar na estrada PO-308 a construción dunha senda entre O Covelo e Raxó, no Concello de Poio, e actualmente está executándose a senda da PO-300 entre o polígono industrial do Salnés e o lugar de Sameiro, na parroquia de Setepías, nos Concellos de Ribadumia e Cambados.