Publicado por 
A Xunta de Galicia acaba de sacar a licitación un lote de obras para introducir enerxías renovables nos centros de saúde galego valorado en 1,5 M€. Dentro do mesmo está incluída a instalación de caldeiras de biomasa por importe de 194.174 euros en tres centros de saúde da Área Sanitaria de Ferrol, tal e como anunciaron hoxe a delegada territorial da Xunta en Ferrol, Martina Aneiros, e o xerente do Área Sanitaria, Ángel Facio, durante unha visita ás instalacións sanitarias de Cerdido.
Na visita, na que tamén estivo presente a subdirectora de Atención Primaria da área de Ferrol, Marián Trueba, Aneiros adiantou que as obras acometeranse nos centros de saúde de Cerdido, onde se prevé un investimento de 48.062 euros; San Sadurniño, cuxo custo ascenderá a 54.235 euros, e Cedeira, por valor de 91.877 euros, tal e como consta no prego de condicións.
Pola súa banda, o xerente da Área Sanitaria apuntou que este contrato materialízase a través dun acordo entre o Sergas e o Inega, dependente da Consellería de Economía, Industria e Innovación, que promove a través da Axenda Enerxética Galicia 2023 a integración de enerxías renovables en edificios públicos e facilita o seu cofinanciamento polo programa operativo FEDER Galicia 2017-2020, dentro da súa actuación de fomento das actividades asociadas ao ciclo de aproveitamento da biomasa térmica e outras tecnoloxías renovables na administración xeral da comunidade autónoma e no sector público autonómico.
“Estas actuacións correspóndense á aposta do Goberno galego polas enerxías renovables e a economía circular, na que se implican distintos departamentos da Xunta e na que se integra tamén a sanidade pública galega”, sinalou Aneiros. A este respecto, a delegada lembrou que o pasado mes de xuño o Sergas aprobou tamén a súa Estratexia de Economía Circular que leva a política de redución de residuos, reutilización de materiais e reciclaxe á sanidade pública e centra un dos seus eixos na minimización do consumo de combustibles fósiles.
