A Xunta licita a elaboración do proxecto e a execución do novo emisario submarino da depuradora dos Praceres, na ría de Pontevedra, por máis de 12 millóns de euros

As empresas interesadas en levar a cabo este contrato, cun prazo de execución de 18 meses, poderán presentar as súas ofertas ata o vindeiro 14 de outubro
Publicado por o día 12/08/2019 na sección de Galicia,Pontevedra,Xunta de Galicia

A Xunta licita a elaboración do proxecto e a execución do novo emisario submarino da depuradora dos Praceres, na ría de Pontevedra, por máis de 12 millóns de euros

A Xunta publica hoxe na Plataforma de Contratos de Galicia a licitación da elaboración do proxecto e a execución das obras do novo emisario submarino da estación depuradora de augas residuais dos Praceres, na ría de Pontevedra, cun orzamento de máis de 12 millóns de euros.

Cómpre lembrar que o Consello da Xunta autorizaba recentemente o gasto para avanzar nesta obra hidráulica declarada de interese da comunidade autónoma no Plan hidrolóxico da demarcación hidrográfica de Galicia-Costa.

As empresas interesadas en levar a cabo este contrato, que ten un prazo de execución de 18 meses, poderán presentar as súas ofertas ata o vindeiro 14 de outubro.

A actuación divídese en dúas partes: a obra terrestre, que se corresponde coa execución da cámara de carga e estación de bombeo a emisario, e o emisario submarino. As obras proxectadas darán servizo a unha poboación aproximada de 141.204 habitantes para o ano horizonte 2042.

Trátase de executar un novo emisario submarino que separe os vertidos industriais e os residuais e que conte coas dimensións axeitada ás necesidades actuais e futuras

Cómpre lembrar que este proxecto incorporou varias modificacións co fin de dar solución ás cuestións suxeridas no proceso de información pública, o que supuxo un incremento duns 2 millóns de euros no orzamento.

Neste sentido, modifícase a localización da cámara de carga e da estación de bombeo a fin de reducir o seu impacto visual, deixando libre a fachada litoral. E tamén se incrementa a lonxitude do tramo inicial no túnel do emisario de cara a non afectar aos bancos marisqueiros a pé dos Praceres, sen que esta medida implique un incremento do volume de escavación.

O saneamento da ría de Pontevedra é unha das principais prioridades do Goberno galego para os próximos anos en materia de actuacións hidráulicas. O programa de actuacións que está en desenvolvemento na ría xorde dun proceso de planificación que se leva a cabo dende o ano 2016.

Paralelamente a esta actuación cabe destacar que a Xunta xa ten licitadas as obras de mellora do proceso de depuración da EDAR de Praceres, que contan cun orzamento de máis de 16,5 millóns de euros, e que permitirán acadar un tratamento axeitado para as augas residuais de todos os concellos conectados.

Con estas actuación o Goberno galego segue a traballar na recuperación de zonas degradadas pola contaminación da costa, que redundan na mellora da calidade de vida da poboación asentada entorno á ría, aumenta a competitividade económica e fomento do turismo e se mellora a produtividade no sector marisqueiro.

Esta actuación cofinánciase pola Unión Europea a través do Fondo Europeo de Desenvolvemento Rexional nun 80%, no marco do Programa Operativo FEDER Galicia 2014/2020.

Comentar noticia

Your email address will not be published.