A Xunta reparte 400 batas e máscaras entre 14 centros de acollida de animais xestionados por entidades protectoras

A Consellería de Medio Ambiente, Territorio e Vivenda fixo entrega esta semana do material, coincidindo coa reapertura ao público destes centros, nos que xa se permiten de novo as adopcións
Publicado por o día 13/05/2020 na sección de Coronavirus,Medio Ambiente,Xunta de Galicia

A Xunta reparte 400 batas e máscaras entre 14 centros de acollida de animais xestionados por entidades protectoras

A Consellería de Medio Ambiente, Territorio e Vivenda vén de repartir esta semana 200 batas e 200 máscaras de protección entre o persoal de 14 centros galegos autorizados para a recollida de animais abandonados e que están xestionados directamente por algunha entidade protectora.

A medida coincide, precisamente, coa reapartura ao público destas instalacións, xa que coa entrada en vigor da fase 1 o pasado luns, puideron volver abrir as súas portas e retomar procedementos como as adopcións, que se viran paralizados nas últimas semanas a consecuencia do estado de alarma.

As batas entregadas pola Consellería, procedentes dunha doazón do grupo empresarial Valtalia, están fabricadas a partir de plástico reciclado, especialmente concibidas para tarefas de desinfección e que actúan como unha segunda capa protectora de roupa. No lote tamén se incluíron 200 máscaras adquiridas pola Xunta.

Cómpre lembrar que a finais do pasado mes de abril o Goberno galego contratou con carácter de urxencia o subministro de alimentos a aquelas asociacións de protección e defensa dos animais debidamente rexistradas e que xestionaban nese momento algún centro autorizado para a recollida de animais na comunidade. En total, repartíronse 18.000 quilogramos de penso cos que se garantiu o coidado e manutención dos case 2.300 cans e gatos abandonados que teñen baixo a súa tutela en Galicia.

Estas entidades tamén sufriron o impacto da crise provocada polo COVID-19, polo que se estimou oportuno colaborar con elas deste xeito, co fin de garantir a cobertura das necesidades básicas dos animais aos que acollen e coidan. As restricións impostas durante o estado de alarma, de feito, limitaron os ingresos das asociacións protectoras, xa que, por un lado, unha porcentaxe importante dos mesmos procede da realización de eventos e actividades incompatibles coas medidas de confinamento fixadas polo Estado; e por outro, tamén se incrementaron os tempos de estadía dos animais nas súas instalacións e, por tanto, os custos de alimentación, ao suspenderse as adopcións.