Publicado por 02.02.2021. Afundación, a Obra Social de ABANCA, poñerá en marcha a partir da próxima semana o novo programa «+60 on line» dirixido a este grupo de poboación co obxectivo de manterse activo en casa, conectado e evitar situacións de vulnerabilidade, dada a situación de maior illamento provocada pola pandemia, que se intensificou coas novas restricións. «+60 on line» inclúe propostas con diversas temáticas e en diferentes canles, adaptadas ás necesidades, preferencias e ás diferentes competencias dixitais das persoas maiores, de modo que se poidan conectar simplemente desde un teléfono móbil e participar en calquera das actividades programadas. Toda a información sobre o programa está dispoñible aquí.
«Ante as novas restricións e recomendacións de prevención, faise necesario minimizar os efectos que as limitacións á mobilidade e ao contacto social provocan na saúde física, psicolóxica, mental e emocional das persoas maiores que ven máis afectadas por elas nas súas rutinas diarias. Neste contexto, as canles dixitais, son un medio para articular propostas que nos permitan activarnos física e mentalmente e tamén estar conectados cos demais.», subliña Sabela Couceiro, coordinadora de Envellecemento Activo de Afundación.
A PROGRAMACIÓN
En Afundación TV deseñouse unha proposta en aberto, gratuíta e sen inscrición previa, dirixida a todo o público sénior aínda que cunha preocupación especial polo coidado da saúde e benestar das persoas que viven soas. Así, programáronse actividades con exercicios de intensidade leve e moderada, para traballar as capacidades físicas básicas como forza, equilibrio e coordinación, fundamentais na prevención de caídas. Haberá tamén un curso de cociña con receitas sinxelas e saudables, con trucos prácticos para persoas que cociñan só para elas e necesitan motivación. Así mesmo programouse un taller con técnicas de atención e concentración para aprender a vivir o momento presente e previr a tensión; danza para manterse en forma dunha maneira lúdica ou unha viaxe polos Camiños de Santiago neste Xacobeo, repasando historia e arte.
«+60 on line» utilizará así mesmo WhatsApp como unha ferramenta de traballo e contacto cos participantes nas actividades, tendo en conta que é a aplicación que máis utilizan as persoas maiores de 65 anos e que o teléfono intelixente é o dispositivo que máis usan para conectarse. Por este motivo, o programa inclúe tamén a nova actividade «Xadrez saudable: xoga e adestra o teu cerebro», que utiliza o exitoso método de adestramento cognitivo con xadrez (ECAM), patentado polo Club de Ajedrez Magic de Extremadura. Coa coordinación de especialistas dos Espazos + 60 de Afundación, permite realizar xogos de memoria e atención con outras persoas a través de WhatsApp utilizando o taboleiro de xadrez. A actividade é gratuíta, aínda que require inscrición previa aquí.
Por outra banda, a proposta inclúe tamén un completo programa de actividades formativas virtuais, na plataforma «+60 Classroom», que ata o de agora era utilizada como soporte e extensión de actividades presenciais nos Espazos +60. Haberá cursos de arte, de idiomas por niveis, fotografía, xadrez, historia ou recursos para superar as barreiras dixitais, entre outros. As clases desenvolveranse por videoconferencia cos docentes e o resto de participantes, previa inscrición, e facilitaranse a modo de proba dúas sesións gratuítas.
Neste contexto cambiante pola pandemia pero tendo en conta tamén o avance da dixitalización en xeral e a adquisición progresiva por parte das persoas maiores de máis competencias neste ámbito, a entidade continuará enriquecendo o programa «+60 on line» en convivencia coa súa oferta presencial, cando esta resulte posible.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.