Agora Podemos presenta un proxecto baseado na coralidade, a transparencia e a participación para os orgános de dirección de Podemos Galicia

Publicado por o día 11/03/2016 na sección de Podemos,Política

Agora Podemos presenta un proxecto baseado na coralidade, a transparencia e a participación para os orgános de dirección de Podemos Galicia

A candidata á Secretaría Xeral e deputada de En Marea Ángela Rodríguez ‘Pam’ e os candidatos ao Consello Cidadán Luca Chao e José Manuel Pérez Afonso presentaron este venres en rolda de prensa unha candidatura coral que dá un paso adiante para devolverlle a Xunta de Galicia e as institucións á xente.

Ángela Rodríguez incidiu na “responsabilidade social co 99%” que asume Agora Podemos e na “necesidade de afondar na feminización da política e en novas formas baseadas na tranquilidade e na serenidade”.

A candidatura aos órganos de dirección de Podemos Galicia, Agora Podemos, presentou este venres en rolda de prensa un proxecto baseado na coralidade, a transparencia e a participación como eixos fundamentais, e formado por un equipo que dá un paso adiante para devolverlle a Xunta de Galicia e as institucións á xente. Así o indicou a candidata á Secretaría Xeral e deputada de En Marea, Ángela Rodríguez, que incidiu na “responsabilidade social co 99%” que asume Agora Podemos e na “necesidade de afondar na feminización da política e en novas formas baseadas na tranquilidade e na serenidade”.

Ademais, Ángela Rodríguez sinalou que “este equipo leva tempo traballando para facer posible o imposible, como amosamos o 20D co histórico resultado de En Marea”. Na súa intervención, a candidata á Secretaría Xeral de Podemos Galicia incidiu na necesidade de dar este paso para respostar á emerxencia social que vive a cidadanía galega cun proxecto “cheo de ilusión e alegría, e moi capaz para afrontar este bonito reto” para “facer posible o cambio en Galicia”, un obxectivo que será acadado “a través da participación da xente”.

Pola súa banda, a candidata ao Consello Cidadán, Luca Chao, explicou as liñas que Agora Podemos considera fundamentais para o futuro de Podemos Galicia. Así, indicou que o centro está no social, xa que o compromiso con ese 99% pasa por “poñer en marcha un paquete de medidas urxentes que revertan a situación de emerxencia social e que poñan o acento no importante: as persoas”.

Outro dos eixos consiste no rescate da democracia ante unha “demanda social ineludible de traballar por un novo modelo democrático máis participativo para mudar a relación tradicionalmente unidireccional entre institucións e cidadáns”. Ademais, Luca Chao, expuxo a defensa de Agora Podemos dun proxecto que “conte con todas as mulleres” e garantice que estean presentes en todos os ámbitos da organización para acadar esa “necesaria feminización da política”. O cuarto dos piares, segundo sinalou a candidata ao Consello Cidadán, consiste en “dar resposta á realidade plurinacional da que formamos parte”. “Somos conscientes de que levar esta axenda ás institucións non será doado. E é un reto que require da meirande unidade popular posible” dentro dun proceso, “permanentemente aberto e en construción”.

Este reto de gañar a Xunta de Galicia para a xente pasa por facer de Podemos Galicia “unha ferramenta de empoderamento cidadá que funcione de xeito ainda máis eficaz para ser máis fortes”, segundo explicou o candidato ao Consello Cidadán, José Manuel Pérez Afonso. Para logralo “cremos na coralidade na intelixencia colectiva e na construción dun Podemos Galicia plural”, continuou. En materia de transparencia destacou a creación dunha Secretaría de Transparencia e Control Democrático, “respostando á firme convicción da necesidade de establecer mecanismos que garantan unha boa práctica democrática”. No tocante ás propostas participativas, José Manuel Pérez enumerou a articulación de xuntanzas comarcais para o debate, asembleas sociais nas que o Consello Cidadán Galego se reunirá con colectivos e asociacións para coñecer a súa problemática e levar ás institucións a voz da cidadanía, ademais da creación de espazos de reunión presenciais coas secretarías xerais municipais para pedir e render contas “ante a xente de Podemos que está a pé de rúa todos os días”. “Neste proxecto ninguén que queira sumar quedará polo camiño, as mans están tendidas para que entre todas e todos rescatemos á cidadanía”, concluíu.

PRENSA AGORA PODEMOS