Alemaña, Portugal, Reino Unido e Chile solicitan información sobre o Efecto PO2

Nestas semanas continuaron chegando peticións de información e de encontros on-line para coñecer a transformación da cidade.
Publicado por o día 17/01/2021 na sección de Galicia,Pontevedra

Alemaña, Portugal, Reino Unido e Chile solicitan información sobre o Efecto PO2

O Efecto PO2 continúa a ser reclamo, obxecto de estudo e investigación en todo o mundo como o demostran as últimas peticións de información, entrevistas, encontros on-line chegados ao Concello de Pontevedra para coñecer o estilo de vida da cidade. A Concellaría de Promoción da Cidade, que dirixe a portavoz do Goberno, Anabel Gulías, acaba de xestionar un encontro co Colexio de Arquitectos de Catalunya no que participou o alcalde Miguel Anxo Fernández Lores, e na súa axenda tamén están previstas colaboracións con Portugal, Reino Unido, Chile ou Alemaña.

Esta semana o alcalde mantivo unha entrevista on-line co Colexio de Arquitectos de Cataluña que está a dar a coñecer “importantes proxectos de renovación urbana” a través das súas redes sociais. Pontevedra foi unha das cidades escollidas para coñecer os retos co que se atopou á hora de pór en marcha esta transformación.

Os arquitectos cataláns preguntaron sobre como era a Pontevedra antes do cambio, que decisións se adoptaron para evitar o acceso dos vehículos a motor, que é o metrominuto ou cal foi o papel dos veciños e veciñas, entre outras.

Esta entrevista publicarase nos vindeiros días nas redes do Colexio de Arquitectos de Catalunya.

Alemaña 

Unha das colaboracións máis importantes recibidas nestes últimos anos é a que solicitou a Axencia Federal de Medio Ambiente de Alemaña e o Instituto de Investigación do Transporte do Centro Aeroespacial alemán.

Estes dous organismos están a realizar, nestes momentos, un proxecto sobre as mellores prácticas de redeseño e redistribución do espazo público en favor das formas activas para a mobilidade e as cidades para as persoas. É un proxecto no que recollen experiencias tanto alemás como do resto do mundo.

Neste proxecto “gustaríanos preparar a peonalización de Pontevedra como un exemplo de éxito e presentalo nunha ficha e nunha publicación”, para desenvolver pautas para as cidades e municipios co fin de que sirvan de inspiración e apoio para redeseñar os seus espazos públicos a favor dos modos activos e os espazos habitables.

O Concello de Pontevedra xa se puxo en contacto cos organizadores e comezou a enviarlles toda a información que precisen para a publicación.

Reino Unido

O convite chegado do Reino Unido para o vindeiro 18 de marzo é do National Walking Summit 2021 organizado por Living Streets, unha entidade benéfica con sede en Londres, que defende o camiñar.

Esta organización reúnese unha vez ao ano con responsables políticos, activistas, veciños e veciñas para debater sobre a construción das cidades de tal xeito que sexan mellores para camiñar.

Na edición deste ano abordarase como os líderes das cidades responderon ante a pandemia, como camiñar pode formar parte do cambio climático ou como poden contribuír os veciños e veciñas das cidades á redución do tráfico.

Portugal

O convite máis recente que acaba de recibir a Alcaldía de Pontevedra é do International Play Association-Portugal que o vindeiro mes de maio (28, 29 e 30) organizará unhas xornadas sobre o xogo infantil, en colaboración coa Facultade de Motricidade Humana da Universidade de Lisboa e o Concello de Cascais. O título das xornadas, motivadas pola Covid, será “Xogar coa incerteza e cos desafíos”.

Os organizadores buscan de Pontevedra amosar como se pode facer unha cidade na que os nenos e os adultos poidan camiñar, xogar e ter acceso ao lecer nunha contorna segura, e no que os coches non dominen o espazo público.

No propio convite asegúrase que “Pontevedra é un exemplo en canto a urbanismo e mobilidade amigábel, que ten en conta as necesidades de dereitos da infancia, como o dereito ao xogo rexistrado no artigo 31 da Convención dos Dereitos do neno”.

Chile

Tamén contactou coa Alcaldía de Pontevedra a entidade internacional EY, para que Pontevedra participe nunha xornada de boas prácticas en sustentabilidade, da man do departamento que a entidade ten en Chile. Trataríase de formar parte dun Benchmark internacional de iniciativas ambientais desenvolvidas polos gobernos locais, co propósito de compartir as experiencias e mellorar as prácticas ambientais dos concellos de Chile que participan no Sistema de Certificación Ambiental Municipal (SCAM) do Ministerio de Medio Ambiente de Chile.

Comentar noticia

Your email address will not be published.