Ana Miranda ve positivo que o xuíz pida á UE un informe integral de riscos no accidente de Angrois

Lembra que o BNG xa reclamara o informe integral de riscos da liña Ourense-Santiago onde se produciu o accidente que provocou a morte de 80 persoas e 144 feridos
Publicado por o día 27/06/2017 na sección de BNG,Política

Ana Miranda ve positivo que o xuíz pida á UE un informe integral de riscos no accidente de Angrois

A portavoz do BNG en Europa, Ana Miranda considera moi positivo que o  xuíz instrutor do accidente ferroviario de Angrois,  Andrés Lago  Louro requira  da  Axencia Ferroviaria Europea un informe para determinar a  avaliación integral de riscos  na liña   Ourense-Santiago, onde se produciu o accidente de Angrois.

Miranda salienta que o BNG xa solicitou un informe de riscos integral á Axencia Ferroviaria europea  para non circunscribir a avaliación exclusivamente á  maquina e a liña porque, ao seu xuízo, “deberon contemplarse todos os riscos sobre todo ante a posta en marcha dun novo tren de alta velocidade”.

Por outra parte, a portavoz do BNG en Europa asegura que a petición do xuíz Lago Louro é “un primeiro paso no esclarecemento do accidente de Angrois” ao que debe seguir a solicitude de comparecencia da propia Axencia Ferroviaria europea. Estou segura, afirma Miranda, que a Axencia responderá de maneira satisfactoria a toda a información que dende Galiza lle sexa requirida no xuízo.

Miranda reitera que a avaliación de riscos “era obrigatoria”  como establecía a propia Axencia Ferroviaria europea, sen  embargo  “nin o Estado nin ADIF estiveron dispostos a realizala ”.