Ana Pontón aposta pola intervención pública de Barreras para salvar o emprego e acusa a Feixóo de poñerse de perfil

Pérez Igrexas recalca a importancia deste emblemático estaleiro para o futuro naval na Ría de Vigo “que non pode estar a expensas das veleidades do accionariado”

O BNG pide ao presidente da Xunta que deixe de ser un “convidado de pedra” e que se implique na busca dunha solución de futuro para Barreras, tendo en conta a condición de estaleiro emblemático na ría de Vigo, e sendo o naval un sector estratéxico tanto para a cidade olívica e comarca como para o conxunto de Galiza. Por iso, a formación nacionalista propón a intervención pública de Barreras para evitar que quede ao pairo das loitas de poder do accionariado e traballar desde ese control nunha solución que garanta a súa viabilidade.

Así llo transmitiron a portavoz nacional, Ana Pontón, e o portavoz municipal en Vigo, Xavier Pérez Igrexas, nun encontro en Vigo cunha nutrida representación do comité de empresa do estaleiro.

“Temos unha gran preocupación pola situación de Barreras, por ser o estaleiro máis importante nun sector naval que é estratéxico para Vigo pois afecta a mil empregos directos e máis de  trinta empresas auxiliares”, salientou Pontón, por iso, “Feixóo non pode seguir de perfil ante a crise de Barreras e a Xunta debe liderar unha alternativa, a prioridade ten que ser evitar o peche do estaleiro, continuar coa súa carga de traballo e por iso o Goberno galego debe implicarse, poñerse mans a obra”.

Neste sentido, subliñou, a proposta do BNG “é que a Xunta se faga con control accionarial do estaleiro para, desde aí, buscar unha solución de futuro”, recalcou a líder nacionalista.

“O único escenario que o Bloque non contempla é o do peche, pois sería un golpe á comarca de Vigo que xa está soportando unha grave desindustrialización. Por iso, esiximos á Xunta que se implique e a Feixóo que exerza como presidente, de tal xeito que, se el foi o intermediario para o desembarco de PEMEX a Barreras, ten que actuar agora para buscar unha solución de viabilidade do estaleiro”, declarou.

O BNG tamén formula dúas propostas concretas: recuperar a mesa do sector naval, “pois urxe unha política industrial e unha aposta estratéxica por un sector no que temos capacidade para producir e ser competitivos”, e acadar unha tarifa eléctrica galega para que as empresas se beneficien de ser Galiza exportadora neta de electricidade reducindo así custes enerxéticos e ganado en competitividade. “Non ten que haber precariedade laboral cando poderíamos competir reducindo os custes enerxéticos cunha tarifa eléctrica galega”, salientou Pontón.

En todo caso, a maior urxencia é evitar o peche dun estaleiro emblemático para o sector naval en Vigo e comarca e, por iso, a Xunta “ten que ser un axente activo á hora de buscar unha solución porque o que de ningunha maneira pode repetirse é a situación de Vulcano”, concluíu.

Pérez Igrexas insistiu nesta mesma idea cunha mensaxe contundente: “non podemos permitir o escenario do peche de Barreras porque na práctica suporía ameazar a continuidade do propio sector naval na Ría de Vigo e falamos dun sector económico estratéxico e de creación de emprego de primeiro nivel, sen o cal non que se pode concibir o desenvolvemento económico e produtivo desta cidade”, argumentou.

Por iso, alegou o portavoz municipal, “a Xunta ten que deixar de ser unha convidada de pedra para evitar que o futuro de Barreras siga a depender das veleidades e das loitas internas do seu accionariado. Para garantir a continuidade do emprego, -indicou-, é indispensable  a intervención pública por parte do Goberno galego”, sintetizou.

Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.

SIGUENOS EN TELEGRAM