Publicado por 
A portavoz nacional, Ana Pontón, aproveitou a sesión de control para denunciar a falta de política social de vivenda do Goberno Feixóo que se plasma nun drástico recorte tanto dos investimentos como da promoción de vivenda protexida, en particular con destino a alugueiro, pese ao incremento dos prezos nas grandes cidades.
“Leva 10 anos aplicando recortes e privatizacións que non só afectan á sanidade, a educación ou a dependencia tamén ao dereito fundamental a unha vivenda digna”, salientou Pontón, quen avanzou que os e as galegas van emendar nas urnas esta ausencia de política social de vivenda nas eleccións de 2020.
“Non ten política de vivenda pública e iso está deixando tiradas a moitas persoas e hai medidas que se poden impulsar, pero para iso ten que ter a cabeza en Galiza e non en salvar os mobles do PP despois dos sucesivos descalabros electorais. Entendo que estea preocupado porque vai ter que render contas dentro dun ano e non ter política de vivenda pública vaille pasar factura”, augurou, tras ironizar sobre a escasa influencia que ten ante Pablo Casado e o pretendido xiro ao centro: “son as consecuencias de dez anos de submisión”.
“Quédalle un ano para rectificar, señor Feixóo porque senón en 2020 serán os galegos e as galegas as que rectifiquen a súa falta de política de vivenda nas urnas”, recalcou.
Entre as medidas propostas polo BNG: a transferencia das vivendas do SAREB para destinala a vivenda social, fomentar a rehabilitación e a promoción de vivenda pública tendo en conta que hai 14.000 demandantes inscritos no rexistro único de vivenda da Xunta, un fondo social para facilitar o acceso á vivenda aos colectivos con máis dificultades e gravar aos fondos voitre e a entidades bancarias que reteñen bolsas de vivenda para especular.
Pontón reclamoulle a Feixóo un cambio de rumbo tras anos de recortes, de tal xeito que hoxe destina a política social de vivenda un 75% menos que fai dez anos, paralizou a construción de vivenda de promoción pública, -en 2009 entregábanse 1.778 vivendas con algún tipo de protección e en 2017, a cifra foi de doce-.
“Desde 2014 non fixo nin unha soa vivenda pública en alugueiro, vergoñento sobre todo se temos en conta que no último semestre de 2018 tivemos 5 desafiuzamentos diarios por impagos”, denunciou a líder do Bloque. Pontón reprochou especialmente o abandono da política de aluguer que deixa fora do acceso a unha vivenda á xente moza.
“Os prezos non deixaron de subir nas grandes cidades o que, unido aos baixos salario, fan que o acceso a unha vivenda sexa misión imposible para a mocidade en cidades como Vigo, A Coruña ou Santiago nas que o prezo do aluguer supón máis do 50% dos seus ingresos”, alegou a dirixente do Bloque. A día de hoxe hai 4.000 mozos e mozas apuntados no rexistro como demandantes de vivenda protexida, “pese a iso, a Xunta no promoveu vivenda protexida en aluguer desde 2014, cero”, recalcou.
“Vostede sega instalado na auto compracencia, pero en 2020 os galegos e as galegas diranlle nas urnas o que pensan da desfeita da súa política social de vivenda”, concluíu.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.
