Ana Pontón: “Fagamos historia o 12X cunha muller nacionalista como presidenta para construír unha nova Galiza”

Galiza precisa un goberno “que se faga valer” e para iso a derrota do PP ten que estar liderada polo Bloque
Publicado por o día 25/06/2020 na sección de BNG,Política

Ana Pontón: “Fagamos historia o 12X cunha muller nacionalista como presidenta para construír unha nova Galiza”

Facer historia. Ese é o reto que se marca o BNG na cita electoral o 12 de xullo para que, por primeira vez, este país teña unha muller e unha nacionalista presidenta, liderando o goberno que permita construír unha nova Galiza. É par iso, só se necesita que todas as persoas que queren un cambio real, un cambio galego, se mobilicen de xeito masivo nas urnas da man da formación nacionalista e da súa candidata á Presidencia, Ana Pontón.

E foi precisamente Pontón quen apelaba a facer historia e a unha mobilización masiva no acto de apertura de campaña en Santiago de Compostela, previo á tradicional pegada de carteis esta medianoite tamén na capital do país, no que estivo acompañada polas persoas que encabezan as candidaturas: Xosé Luís Rivas (A Coruña), Olalla Rodil (Lugo), Noa Presas (Ourense) e Luís Bará (Pontevedra).

“Comeza unha campaña na que nos marcamos un obxectivo tan ambicioso como ilusionante: facer historia é que por primeira vez Galiza teña unha muller nacionalista como presidenta”, proclamou, “facer historia é conseguir o cambio que prenda o motor deste país e venza á parálise e a submisión que representa o PP; facer historia é construír unha nova Galiza, gobernada desde nós, viva, dinámica, con futuro, que se faga valer, que non baixe a cabeza diante de Madrid e que aposte con decisión por abrir un país novo”, explicou Pontón.

E para conseguir facer historia apelou á mobilización masiva de todas as persoas que queren un cambio real, pediu que a vontade de cambio se exprese nas urnas collendo a papeleta do BNG. “Para facer historia hai unha condición: mobilizarse”, subliñou, “ninguén que queira unha Galiza mellor pode quedar na casa, a ilusión que hai na sociedade por un cambio galego ten que mostrarse con orgullo, facerse visible e proclamarse sen complexos nas urnas”.

Neste sentido, a candidata nacionalista deixou claro que estamos ante unha campaña “que se vai librar casa a casa, conversa a conversa, opinión a opinión, voto a voto”.

O 12 de xullo “toca escoller”, indicou, “entre a Galiza parada de Feixóo e a Galiza co motor en marcha do BNG, escoller entre unha nova maioría do PP para que seguir no retroceso, perdendo peso económico, político e social ou elixir o cambio galego que representa o BNG cun proxecto capaz de poñer o país en marcha”.

“Quero ser a presidenta desa nova Galiza, dese país que se vai facer valer, que vai usar ao seu favor a súa capacidade, o seu potencial, os seus recursos. E por iso, apelo hoxe a toda esa Galiza viva, dinámica e esperanzada que non quere catro anos máis de parálise e retroceso senón que quere abrir un tempo novo, apelo a que se mobilice por un cambio real para facer historia, para que por primeira vez Galiza teña unha muller nacionalista na Presidencia”, recalcou.

Confiar e nós mesmos, en nós mesmas

Pontón non escatimou entusiasmo e corazón á hora de pedirlles aos galegos e as galegas que aposten por darlle “un novo rumbo” ao país o 12X, “confiando en nós mesmos, en nós mesmas”, sabendo que o BNG é a única forza capaz de liderar un goberno “que se faga valer” e por iso “somos a alternativa para derrotar ao PP”.

“É tempo de que teñamos un Goberno que mire polo noso e acabe con tantos anos de submisión que nos deixan un país minguante: menos poboación, menos emprego, menos industria, menos oportunidades. Por contra, Galiza ten que ir a máis en oportunidades, en igualdade real das mulleres, en futuro para a xente moza, a máis en innovación e emprego”, enumerou.

Ilusión e rebeldía para poñer Galiza en marcha

“É tempo de prender o motor de Galiza e recuperar o pulso do país, tempo de poñer en marcha un goberno liderado polo BNG con proxectos e con ideas para mellorar a vida da xente; é tempo de ilusión e de rebeldía é o tempo de levar ás urnas as loitas sociais contra os recortes e as privatizacións nos servizos públicos e nos servizos sociais apoiando de maneira masiva o cambio galego que representamos”, proclamou a líder nacionalista.

“Hoxe comeza a conta atrás do cambio galego e como candidata eu, e o resto de compañeiros e compañeiras, enfrontamos a campaña con ilusión, conscientes de que estamos nun momento excepcional no que Galiza pode facer historia cunha muller nacionalista como presidenta”, concluíu.

Comentar noticia

Your email address will not be published.