Antón Sánchez: “a nova Lei de Ordenación do Territorio é o colofón a esta lexislatura de expolio do país”

O voceiro do Grupo Común da Esquerda defendeu no Pleno desta mañá unha emenda de devolución
Publicado por o día 28/01/2020 na sección de Grupo Común da Esquerda,Política

Antón Sánchez: “a nova Lei de Ordenación do Territorio é o colofón a esta lexislatura de expolio do país”

O Grupo Común da Esquerda presentou no debate parlamentario da nova Lei de Ordenación do Territorio de Galicia, desenvolvido ao longo desta mañá, unha emenda de devolución. Defendeuna Antón Sánchez, argumentando que as motivacións para a reforma lexislativa defendidas polo PP “son falsas”. “Esta Lei é unha traizón por parte do Goberno, un monumento á falsidade absoluta e o colofón a esta lexislatura de expolio do rural. O que vostedes buscan é deixar ben atadas as reformas que lles piden os lobbies empresariais antes de que sexan desaloxados da Xunta”, afirmou.

Sánchez criticou que a conselleira de Medio Ambiente, Territorio e Vivenda non fixese un balance da aplicación da Lei de 1995 antes de aprobar unha nova, xa que “moitos instrumentos desa Lei non se aplicaron” e “os obxectivos máis importantes non se cumpriron”. “Non fai ese balance porque é demoledor. Galicia é hoxe un país máis desequilibrado e fracasado no que ten que ver coa coordinación entre as Administracións públicas”, agregou. Entre os principais obxectivos da Lei de 1995 están a corrección dos desequilibrios do país entre o Eixo Atlántico e o interior para acadar un desenvolvemento igualitario con oportunidades para todos os territorios e mais a mellora da coordinación administrativa supramunicipal (comarcas, áreas metropolitanas, etc.) para a creación de plans de desenvolvemento económico endóxeno e para acadar unha ordenación a unha escala axeitada. “Lonxe de corrixirse, eses desequilibrios agraváronse durante o seu goberno. Todos os anos, desde que vostedes gobernan, descendeu a densidade de poboación das zonas pouco poboadas a un ritmo espeluznante”, apuntou Antón Sánchez.

No respectivo aos instrumentos da Lei de Ordenación do Territorio que non foron empregados durante os seus 25 anos de vixencia, o voceiro do Grupo Común da Esquerda lembrou que non se aprobou ningún Plan coordinado de actuación entre Administracións nin ningún Plan territorial integrado para crear dinámicas supramunicipais (agás o Plan de Ordenación do Litoral) co obxectivo do desenvolvemento económico e social. En contraste, o 90% dos Proxectos sectoriais de incidencia supramunicipal aprobados foron destinados á instalación de parques eólicos, liñas de alta tensión e centrais hidroeléctricas. “A Xunta impón sempre a súa lei en beneficio das empresas privadas, por enriba do que digan os veciños ou mesmo os concellos, como aconteceu en Laxe cando a corporación municipal se opuxo unanimemente á implantación do parque eólico”, criticou.

Finalmente, Sánchez tamén criticou que a nova Lei suprima a obrigatoriedade das licenzas municipais, unha “vulneración da autonomía municipal”. “Estanlles dando manga ancha aos que xa a tiveron, por exemplo no Oribio, e estanse centrando en mellorar os instrumentos que xa funcionaban ben para as empresas que xa se beneficiaban deles, en vez de corrixir os desequilibrios do país”, denunciou. “Vostedes non poden dicir as motivacións reais para a elaboración desta Lei porque non poden admitir que tiveron demandas de determinados sectores para que lles modificasen a Lei”, engadiu.

Nesta liña, lembrou que a posibilidade de que os Plans de interese autonómico poidan ser non previstos e de iniciativa privada implicaría na práctica deixar a definición do interese autonómico nas mans dos promotores particulares sen necesidade de que as súas iniciativas estean contempladas en ningún Plan sectorial. “Con esta modificación, podería empregarse un proxecto de interese autonómico non previsto para levar adiante un pelotazo coma o de Mos, pasando por enriba dos intereses da xente e da vontade dos concellos”, denunciou.

Comentar noticia

Your email address will not be published.