Antón Sánchez participa na creación da plataforma “Salvemos o Iribio” para defender o Courel de instalacións eólicas

“É a resposta da sociedade civil e política a unha agresión máis ó noso patrimonio natural e cultural”
Publicado por o día 27/08/2019 na sección de En Marea,Política

Antón Sánchez participa na creación da plataforma “Salvemos o Iribio” para defender o Courel de instalacións eólicas

O vicevoceiro do grupo parlamentario En Marea, Antón Sánchez, participou esta mañá en Lugo no acto de presentación da Plataforma “Salvemos O Iribio”, que nace co obxectivo de”defender a Serra do Iribio das obras dun Parque Eólico e das instalacións electromecánicas asociadas, como é a Liña de Alta Tensión Serra do Oribio” e de “facer valer a legalidade vixente que prohíbe a instalación de novos parques eólicos en zonas de Rede Natura 2000”.

Para Sánchez o nacemento desta plataforma “é a resposta da sociedade civil e política fronte a unha agresión máis ao noso patrimonio natural e cultural”. Na súa intervención durante o acto de presentación, o vicevoceiro de En Marea apuntou a que a serra do Iribio (Courel) está a ser agredida polos negocios dunha empresa amparada pola deixadez da Xunta “cunha tramitacion opaca e connivente cos intereses da empresa”.

“E fronte a iso a unidade da sociedade máis consciente e das organizaciósn políticas que defendemos o país é fundamental para parar dunha vez por todas esta agresión que simboliza o modelo do expolio eólico por parte do goberno galego e das multinacionais eléctricas”, sinalou o vicevoceiro do grupo parlamentario En Marea.

Salvemos O Iribio anuncia futuras mobilizacións se a Xunta non decreta de forma urxente e inmediata a paralización das obras do parque eólico do Iribio e das súas infraestruturas asociadas, como son os camiños de acceso ao parque ou a liña de alta tensión.