Argimiro Rojo, elixido primeiro presidente da Red Iberoamericana de Defensorías Universitarias

Máis de 50 defensorías de España, Portugal e América Latina integran a rede
Publicado por o día 03/10/2018 na sección de Galicia,Universidade de Vigo,Vigo

Argimiro Rojo, elixido primeiro presidente da Red Iberoamericana de Defensorías Universitarias

Unha reunión celebrada en xuño de 2015 en Madrid entre representantes da Conferencia Estatal de Defensores Universitarios de España (CEDU) e da Red de Defensores y Procuradores Universitarios de México (REDDU) sentou as bases para a creación tres anos máis tarde da Red Iberoamericana de Defensorías Universitarias, RIDU, organismo que agrupa a máis dunha cincuentena de responsables de defensorías universitarias de España, Portugal, México, O Salvador, Costa Rica, Panamá, Colombia, Perú, Brasil, Arxentina e Chile. A rede celebrou recentemente na cidade arxentina de Córdoba o seu congreso constituínte, no que ademais de aprobar os seus estatutos e formalizar a acta fundacional, elixiu como primeiro presidente ao presidente do Tribunal de Garantías da Universidade de Vigo, Argimiro Rojo. “Este nomeamento supón, en primeiro lugar, un recoñecemento á institución e ao labor do Tribunal de Garantías que teño a honra de presidir; ao seu rigor e eficacia á hora de defender os dereitos e intereses lexítimos dos membros da comunidade e tamén a súa contribución ao fortalecemento e prestixio da figura das defensorías universitarias”, explica Rojo, para quen a súa designación tamén é un impulso á aposta por traballar en rede e por abrirse ao mundo e establecer canles de cooperación con todas as defensorías.

Un foro estable para o intercambio de coñecementos e experiencias

Segundo aparece recollido nos seus estatutos, a rede constituíuse co obxectivo de ser un foro estable que permita a transferencia e o intercambio de coñecemento, información e experiencias relacionadas coas defensorías universitarias dentro do espazo iberoamericano de educación superior. En canto ás finalidades que RIDU pretende acadar están a de velar polo respecto e o avance dos dereitos humanos e universitarios; contribuír á mellora da calidade universitaria en todos os seus ámbitos ou defender a autonomía universitaria, así como promover a creación, fortalecemento e expansión das defensorías universitarias.

“Como primeiro presidente da rede teño moi claro que o obxectivo principal nesta etapa inicial é contribuír ao afianzamento e consolidación da mesma. Iso esixiríanos, por exemplo, contribuír a reforzar os lazos entre as defensorías que xa forman parte da asociación (máis de 50), incorporar ás que aínda non o fixeron (no ámbito iberoamericano existen máis de 200 defensorías universitarias) e promover a creación da institución naqueles países onde ten escasa implantación”, explica Rojo. Potenciar os recursos dixitais e estreitar a colaboración con outras asociacións de natureza afín, son outras tarefas prioritarias que se marca o novo presidente de RIDU, para quen a rede representa “a culminación con éxito dun empeño, no que non faltou algunha dose utopía, soño e ousadía”.