Publicado por 
A Cooperativa de Armadores de Pesca do Porto de Vigo acaba de abrir un concurso público para a contratación da cuarta edición do seu “Festival ARVI do Peixe, Vigo SeaFest”, que en 2020 celebrarase novamente nos Xardíns de Elduayen, durante os días 9, 10, 11 e 12 de xullo.
A data límite de presentación de ofertas é o 9 de decembro ás 18.00 horas.
O “Festival ARVI do Peixe, Vigo SeaFest” é unha celebración anual que conecta a diversión na nosa cidade coa súa actividade económica máis emblemática, a pesca. Hoxe en día converteuse nunha cita de referencia no ámbito gastronómico, que promociona os produtos das nosas frotas pesqueiras e que reúne a máis de 120.000 persoas na área dos xardíns de Elduayen.
O “Vigo SeaFest” veuse celebrando con éxito nas súas tres edicións anteriores ao conxugar a cociña de autor co peixe que capturan as frotas da Cooperativa como alimento estrela, con música, actividades náuticas, talleres infantís, xunto con diversas presentacións e showcookings, desde o ronqueo do atún á preparación dun bo café.
A Cooperativa de Armadores de Pesca do Porto de Vigo tamén lle outorgou moita relevancia, de acordo á importancia que ten, ao aspecto da sustentabilidade e do medio ambiente, organizando no propio festival talleres infantís que teñen por obxectivo mostrar aos nosos nenos, de forma didáctica e interactiva, que poden facer os pescadores e a poboación en xeral para contribuír á conservación e mellora do medio ambiente.
Cabe destacar que o “Vigo SeaFest” contou nas súas edicións anteriores coa colaboración e o patrocinio do Concello de Vigo, a Deputación de Pontevedra, a Consellería do Mar, a Axencia Europea de Control da Pesca, o Consorcio da Zona Franca, ademais de empresas, organismos e entidades asociativas varias. Destaca, así mesmo, a colaboración que Estrela Galicia e ABANCA tiveron e terán a recado con ARVI para o desenvolvemento da próxima edición deste festival.
Os organizadores confían en que en 2020 os vigueses seguirán degustando os produtos pesqueiros de cociña de autor que se poderán consumir a prezos populares, preparados por chefs de coñecidos restaurantes da cidade e de Galicia, ademais doutras exquisiteces gastronómicas ofrecidas por recoñecidos profesionais da restauración.
Noticias de última hora en Vigo
