A Consellería de Cultura e Turismo, en colaboración coa de Educación, Universidade e Formación Profesional, promove a celebración do mes da ciencia en galego cunha completa programación de actividades ao longo de todo novembro dirixida á posta en valor das bibliotecas e mais do seu papel impulsor da creación e da divulgación científicas na lingua propia de Galicia.
Os secretario xeral de Política Lingüística, Valentín García; o director xeral de Políticas Culturais, Anxo Lorenzo; e o profesor titular de Bioloxía da Universidade de Vigo Luis Navarro –autor do texto conmemorativo deste ano– foron os encargados de presentar o programa, nunha rolda de prensa que tivo lugar hoxe na Biblioteca Ánxel Casal de Santiago.
O director xeral de Políticas Culturais lembrou a importancia da divulgación social do coñecemento científico, así como de achegar a ciencia a todos os ámbitos da vida. Neste sentido, explicou que as bibliotecas centrais territoriais xogan un papel fundamental neste obxectivo, posto que, a través desta programación, ofrecen actividades variadas para todos os públicos.
Pola súa banda, o secretario xeral de Política Lingüística, Valentín García, animou a todos os profesionais do ámbito científico “a desenvolver a comunicación, o ensino e a aprendizaxe científica desde a lingua galega poñendo sempre en valor as figuras dos referentes galegos neste eido”. García Gómez recordou que “neste 2018 no que ‘A cultura científica e a cultura galega como patrimonio cultural europeo’ centran (no marco do Ano Europeo do Patrimonio Cultural) as actividades impulsadas por Igaciencia; o Mestre Mateo, arquitecto do Pórtico da Gloria, é a figura galega homenaxeada, ao pé de Arquímedes”.
Ciclo de actividades dedicadas á astronomía
Proxeccións audiovisuais, obradoiros de diversas temáticas para experimentar, espectáculos de maxia, contacontos, mostras bibliográficas, documentais, exposicións, conferencias, un ciclo de actividades dedicadas á astronomía, repositorios con materiais relacionados coa ciencia en galego e proxectos de investigación son algunhas das propostas que se desenvolverán nas bibliotecas públicas de Lugo e de Ourense, na Biblioteca de Galicia, na Biblioteca Juan Compañel de Vigo, na Antonio
Odriozola de Pontevedra, na Miguel González Garcés da Coruña e na Ánxel Casal de Santiago.
Ademais, tamén se organizarán actividades nos centros de ensino a través das bibliotecas escolares –promovidas pola Asesoría de Bibliotecas Escolares da Dirección Xeral de Centros e Recursos Humanos– e do labor que levan a cabo os equipos de dinamización da lingua galega para sumárense, desde o ensino, á conmemoración do Día da Ciencia en Galego.
A programación completa pode consultarse no seguinte enlace http://www.lingua.gal/c/document_library/get_file?folderId=1647062&name=DLFE-17911.pdf.
Como cada ano, a Secretaría Xeral de Política Lingüística divulga desde o Portal da Lingua Galega, en www.lingua.gal, as mellores prácticas e recursos elaborados polos equipos de dinamización da lingua galega.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.