Balseiro subliña que investir en industrias de transformación agroalimentaria é “apostar por un futuro rendible no rural galego”

O delegado territorial explicou que a Xunta destinou en Lugo máis de 9 millóns de euros a 22 proxectos empresariais para instalacións e equipamentos
Publicado por o día 07/04/2017 na sección de Galicia,Lugo,Vigo,Xunta de Galicia

Balseiro subliña que investir en industrias de transformación agroalimentaria é “apostar por un futuro rendible no rural galego”

O delegado territorial da Xunta en Lugo, José Manuel Balseiro, destacou onte que “investir en industrias de transformación agroalimentaria é apostar por un futuro rendible no rural galego”. De aí, explicou, que a Consellería do Medio Rural convoque unha liña de axudas para as empresas que realicen investimentos en transformación e comercialización de produtos agrarios.

Ao abeiro deste programa, a consellería impulsa na provincia de Lugo 22 proxectos aos que destina un investimento total de máis de 9 millóns de euros. Deste total, o pasado ano contabilizáronse pagos por importe de 4,8 euros, dado que as empresas teñen tres anos para desenvolver as súas actuacións.

O delegado apuntou que nos vindeiros meses se sumarán outros proxectos, dado que está en trámite unha nova convocatoria destas axudas. A dotación orzamentaria total ascende a 27,4 millóns de euros, cofinanciada nun 75% polo Feader. Así, para a anualidade do 2017, o presuposto é de 13,1 millóns, para o 2018 a cantidade é de 11,8 millóns e para 2019 a contía ascende a 2,5 millóns de euros.

A meirande parte das iniciativas sufragadas no 2016 corresponden a proxectos relativos á industria láctea (12), se ben tamén se rexistraron dúas relacionadas coa industria cárnica, outras tantas para industrias de castañas e de mel, e diversos investimentos en industrias de pensos, ovos, licores ou conservas.

O delegado territorial fixo estas declaracións durante a visita que realizou á empresa Alibós Galicia SL, en Monterroso, acompañado do xerente da empresa, Jesús Quintá García.

Aproveitar os recursos do entorno

A empresa monterrosina, unha das beneficiarias deste programa de axudas, traballa no aproveitamento de produtos silvestres, como os cogomelos e as castañas, e outros cultivos da comarca da Ulloa, como os espárragos verdes, framboesas e amorodos.

A través desta subvención está a executar obras como a ampliación da nave e a mellora da instalación frigorífica, ademais de adquirir diversa maquinaria e equipamento.

Ao respecto, o delegado lembrou que son subvencionables os gastos de construción, adquisición e mellora de bens inmobles, a compra de maquinaria e equipamentos novos, ou a adquisición ou desenvolvemento de programas informáticos, patentes, licenzas, dereitos de autor ou marcas rexistradas, entre outros.

José Manuel Balseiro gabou o éxito de Alibós Galicia, que hoxe da emprego a máis de 30 persoas, e sinalou que é “un modelo a seguir, un proxecto empresarial que apostou por centrarse nos recursos do seu entorno e desenvolver procesos de transformación e comercialización que engaden valor ao produto”.

Así mesmo, subliñou que Alibós “axuda a diversificar o noso sector agroalimentario e da testemuña de que, con traballo e boa xestión, hai moitos modos de obter rendibilidade dos recursos do rural”.