Publicado por 
A parlamentaria do BNG, Noa Presas afirmou hoxe, a través dunha proposición non de lei sobre as perdas e deficiencias fiscalizadas polo Consello de Contas nas actividades do IGAPE, que este ente público debe estar ao servizo de Galiza e non ser “un burato negro” que desperdicia grandes cantidades de recursos públicos.
Na súa intervención, Presas explicou que o IGAPE é unha ferramenta para “apoiar todas as actividades que contribúan a mellorar o sistema produtivo galego, facilitando os procesos de creación, consolidación e crecemento empresarial.” Polo tanto, unha ferramenta dunha alta importancia en calquera contexto, pero máis aínda nun momento de crise como a que estamos a padecer en Galiza. A luz dos datos que amosa o recente informe do Consello de Contas que fiscalizou as actividades do Igape nos anos 2011-2013, e en particular das axudas en forma de aval, “o IGAPE incumpriu os seus obxectivos e non fixo un uso adecuado dos recursos públicos nun momento de crise económica, contribuíndo a que o PP hipotecase o futuro do país”. Incumprimentos graves e con consecuencias para o noso tecido económico tanto polas perdas económicas xeradas como polo tempo perdido, recalcou a nacionalista.
Asemade, resaltou a importancia do traballo realizado polo Consello de Contas e afirmou que se o PP asumira as recomendacións que leva anos facendo o BNG sobre a urxencia de fiscalizar o IGAPE, “a situación que hoxe traemos aquí teríase corrixido”.
Neste informe, explicou, o Consello atopa numerosas deficiencias, tanto na estrutura como na actuación, “importantes perdas do Instituto no que atinxe a participacións en capital, préstamos e avais, como se relata na exposición de motivos.
Por outra parte, dixo, o Consello de Contas tamén sinala ausencia de información por e descoñecemento dos motivos que impediron o resarcimento das cantidades desembolsadas no relativo ao avais fallidos.
Ante estas deficiencias, o Consello de Contas propón no informe un conxunto de recomendacións para a súa corrección, como a adopción dunha nova regulación en materia de avais, avaliación máis precisa do risco que se asume coas operacións que se van garantir, esixir o pagamento das comisións con carácter anticipado e dunha soa vez, no momento da formalización dos avais, así como máis precaucións nas garantías.
A deputada do BNG concluíu a súa intervención demandando do IGAPE a adopción das recomendacións do Consello de Contas co fin de corrixir as deficiencias detectadas.
Noticias de última hora en Vigo
