O BNG leva ao Parlamento a situación da Illa de San Simón

O deputado Luís Bará, presentou a diversos colectivos a iniciativa para recuperala como Illa da Memoria.
Publicado por o día 13/06/2017 na sección de BNG,Política,Vigo

O BNG leva ao Parlamento a situación da Illa de San Simón

A falla dunha Programación de carácter público na Illa de San Simón, xunto á tendencia á realización de eventos privados, que pouco teñen a ver coa recuperación da memoria histórica, levaron ao Bloque Nacionalista Galego, a presentar diversas iniciativas no Parlamento Galego.

Luís Bará presentoulle á membros do Obradoiro de Estudios Locais Fernando Monroy, do colectivo Alén Nós, e da AA.VV. De Cesantes, a proposición non de lei na que se insta ao goberno galego a elaborar en seis meses un Plan de Usos da Illa de San Simón, onde teña especial protagonismo a recuperación da memoria histórica, considerándoa como Illa da Memoria. Na proposta recóllese igualmente a necesidade de levar a cabo unha programación de actividades de carácter público tanto culturais como medioambientais.

Segundo palabras de Bará “para poder levar a cabo esta oferta cultural e medioambiental, débese contar co criterio dos concellos da beira da Enseada, espacialmente Redondela, e de colectivos que traballen a prol da recuperaicón da memoria histórica”.

“Dende que Feijóo preside a Xunta, esmoreceu o papel de San Simón como enclave de estudio da Guerra Civil, e posterior represión franquista. No seu momento, uns 30.000 visitantes achegábanse cada ano para coñecer unha parte da nosa historia recente”, sinala.

Na proposta que prantexa o nacionalista, cobra grande relevanza a difusión entre a comunidade educativa da historia de San Simón. “Cómpre recuperala como un espazo singular para as novas xeracións, con actividades compatibles coa recuperación de todo o que alí sucedeu”.

Na presentación pública da iniciativa do BNG, os membros dos colectivos salientaron a necesidade de que San Simón, volva a recuper o seu protagonismo como enclave cultural, histórico e medioambiental, cun claro carácter público.