Caballero afirma que os participantes na Boot Camp Race “fan o imposible” en 7 quilómetros en Samil

O alcalde de Vigo, Abel Caballero, presentou a quinta edición do Desafío Boot Camp Race, a celebrarse en Samil o domingo 6 de outubro (10:15 horas). A organización espera uns dous mil participantes.
Publicado por o día 12/09/2019 na sección de Concello de Vigo,Galicia,Vigo

Caballero afirma que os participantes na Boot Camp Race “fan o imposible” en 7 quilómetros en Samil

A carreira de obstáculos, máis de trinta e case todos artificiais, espera uns 2.000 competidores (xa van polo milleiro). “É imposible, pero o fan”, explicou o alcalde sobre esta modalidade. “Cando os seres humanos normais vemos a capacidade dalgunhas persoas para facer deporte extremo, sentimos a importancia do que isto significa, destes 7 quilómetros cheos de tantas dificultades”, dixo.

O rexedor, acompañado do edil de Deportes, Manel Fernández, e de representantes da organización e dos patrocinadores privados, quixo “invitar a toda a cidade a que se achegue para ver deporte extremo, un espectáculo digno de verse, de dificultade extrema e de como os atletas son capaces de facerlle fronte”.

David Suárez, responsable do evento, avanzou que “teremos números récord pola liña que temos de inscricións. Esperamos que o 45% dos participantes sexan de fóra da comunidade autónoma”. De feito xa hai inscritos da Riouxa, Asturias, País Vasco, Canarias, Castela-León e Madrid “e un 5% son de Portugal”.

A montaxe dos obstáculos levará un cento de horas e o evento implica a 41 empresas locais. A competición, ademais, supón “máis de 500 pernoctas en Vigo”. “É unha carreira para todos os públicos”, dixo Suárez, que dende o primeiro ano en categoría Elite é unha das vinte probas do Campionato de España e clasificatoria dende 2016 para o Campionato de Europa, ademais de pertencer á Liga Galega de carreiras de obstáculos.

Ademais, o evento aposta polo medio ambiente (campaña de reciclaxe de plástico a cambio de reforestación da contorna con especies autóctonas baixo a coordinación de montes de Vigo).