Caballero augura un “éxito rotundo” ao Festival Vigo Sea Fest, “a gran festa en torno ao mundo da pesca”

O Concello e a Deputación de Pontevedra asinaron este xoves un convenio de apoio por 155.000 euros ao evento, que aúna gastronomía, música e deporte, e celébrase do 7 ao 9 de xullo
Publicado por o día 06/07/2017 na sección de Concello de Vigo,Eventos,Galicia,Vigo

Caballero augura un “éxito rotundo” ao Festival Vigo Sea Fest, “a gran festa en torno ao mundo da pesca”

O Concello e a Deputación de Pontevedra asinaron este xoves un convenio de apoio por 155.000 euros ao evento, que aúna gastronomía, música e deporte, e celébrase do 7 ao 9 de xullo.

O alcalde de Vigo, Abel Caballero, e a presidenta da Deputación, Carmela Silva, asinaron esta mañá un convenio de apoio ao Vigo Sea Fest, o Festival ARVI do Peixe, que se celebra este venres, sábado e domingo en máis de 23.000 metros cadrados na zona dos Xardíns de Elduayen e do Náutico de Vigo e que axuntará, por primeira vez, a cociña con produtos do mar, a industria pesqueira, a música e os deportes náuticos e de praia.

“A Vigo faltáballe esta gran festa en torno ao peixe e á alimentación porque somos unha gran despensa de toda España e de parte de Europa e necesitábase a visualización dunha parte deste traballo”, asegurou o rexedor, á vez que augurou un “éxito excepcional” ao evento que “chega a Vigo para quedar”.

O convenio supón unha achega total de 155.000 euros, dos que 105.000 son do Concello de Vigo e 50.000 da Deputación de Pontevedra. “A contía é importante pero aínda máis o entusiasmo que puxemos todos no proxecto”, comentou Caballero, que lembrou que só en Vigo a pesca extractiva xera 30.000 empregos.
“É unha enorme satisfacción que todos cooperemos nestes actos e participemos no desenvolvemento da cidade de forma conxunta”, agradeceu o alcalde.

Pola súa banda, Carmela Silva tamén augurou que o Sea Fest “vai converter desde este primeiro ano nunha referencia xa que o organiza a cooperativa de armadores, que ten unha larguísima tradición no ámbito da economía de Vigo e unha enorme capacidade para xerar proxectos, economía e emprego”. “Era necesario un evento como este para mostrar ao mundo a realidade da nosa pesca, que é referencia mundial”, afirmou.

O presidente da cooperativa de armadores do Porto de Vigo, Javier Touza, agradeceu a “total receptividade” por parte das institucións que tiveron desde que comezaron a traballar neste proxecto. “Necesitamos que os medios de comunicación sigan transmitindo todas as inquietudes do sector ante os retos que nos ameazan”, apuntou, á vez que resaltou á xente do mar como “un colectivo transcendental” económica e socialmente en Vigo e en Galicia. “Vigo é a despensa azul de Europa e queremos que a xente lle poña cara á pesca”, concluíu.