Caballero sinala que o Circuíto Concello de Vigo de atletismo en pista, que arrinca este domingo, contará “cos mellores de Galicia”

O alcalde de Vigo, acompañado polo concelleiro de Deportes, Manel Fernández, e por representantes dos clubs AVA e Beade, presentou este xoves a segunda edición do Circuíto Concello de Vigo de atletismo en pista.
Publicado por o día 12/01/2017 na sección de Atletismo,Concello de Vigo,Deportes,Vigo

Caballero sinala que o Circuíto Concello de Vigo de atletismo en pista, que arrinca este domingo, contará “cos mellores de Galicia”

Como en 2016, o Concello patrocina un evento clásico (a histórica serie municipal), “unha gran proba que reúne aos mellores de Galicia de todas as categorías”, explicou o rexedor.

Por segundo ano consecutivo a Concellería de Deportes encargou á Agrupación Viguesa de Atletismo (AVA) a organización das sete probas, dous con programa de tempada de inverno (15 e 22 de xaneiro) e cinco do programa ao aire libre (9 de abril, 7 e 14 de maio, 4 de xuño e 2 de xullo). Este ano o Gran Premio Cidade de Vigo, o certamen estrela do atletismo en pista vigués, se desvincula do circuíto. Un ano atrás era a proba que o pechaba.

“Grazas ao apoio que amosa o Concello para a promoción do atletismo de Vigo e de Galicia”, manifestou José Luís Domínguez (AVA), “o ano pasado nas pistas de Balaídos alcanzáronse catro mínimas para os Europeos, o que é significativo”, avanzou o directivo.

Cunha media de 400-500 atletas por xornada e diversidade de probas en función das necesidades de todos os clubs locais, Caballero anunciou que o circuíto recibirá uns 3.000 participantes de xaneiro a xullo.

O xefe do goberno municipal tamén dixo que durante 2016 o Concello investiu 75.000 euros en accións directas sobre o estadio atlético: dende o gasto enerxético ou a sustitución de focos ou o mantemento xeral da instalación á compra dunha colchoneta para pértega co seu protector (23.000 euros), a reparación da foto finish ou da gaiola de lanzamentos.

O Concello, ademais, mantén a gratuidade das pistas para os clubs locais.