Publicado por 
O alcalde de Vigo instou este mércores á Xunta de Galicia a levar a cabo o transvasamento de Eiras para garantir o abastecemento de auga en toda a comarca cando volva a rexistrarse outra época de seca. Ademais, sinalou que é necesario o axuste do caudal ecolóxico e lembrou que aínda non recibiu resposta á última carta remitida á administración autonómica sobre estes dous asuntos.
“Vigo e toda a súa contorna, cunha poboación dunhas 450.000 persoas, teñen a necesidade urxente de solucionar o abastecemento de auga, porque estamos en risco de sufrir outro episodio de seca”, sinalou Abel Caballero durante a súa comparecencia ante os medios de comunicación.
O rexedor lembrou que o Concello acordou con Augas de Galicia e a Xunta o transvasamento de emerxencia do río Verdugo, de 3,3 quilómetros e un custe de 6 millóns que sufragaría Vigo. Tamén sinalou que a Xunta de Goberno Local aprobou o convenio en decembro, pero que non recibiu resposta, polo que o pasado 27 de abril remitiu unha nova carta á que tamén agarda por unha contestación.
Caudal ecolóxico
“De forma adicional expoño na carta que de xeito inmediato a Xunta ten que revisar o caudal ecolóxico, porque estamos en situación susceptible de sufrir severas secas e o caudal é disparatado”, sinalou o alcalde.
Caballero explicou que no caso de que se repita un outono de poucas precipitacións tanto a cidade como a comarca poden ter problemas, polo que é preciso cambiar o nivel do caudal ecolóxico de forma inmediata. “O transvasamento xa non se pode facer para este outono, xa non da tempo, pese a que estamos dispostos a pagalo, polo que é imprescindible reducir o límite do caudal”, indicou.
Solución definitiva
O alcalde tamén avanzou que é necesario estudar a solución definitiva para traer auga a Vigo e mencionou o caso da cidade da Coruña, que duplicou as súas reservas conectando a lagoa de Meirama co embalse de Cecebre. “Desde xaneiro a abril tiramos ao mar o equivalente a cinco presas de Eiras, auga hai, o que temos que ser é capaces de aumentar o seu embalsamento”, explicou.
As obras levadas a cabo na Coruña permitiron á cidade pasar de 20 a 40 hectómetros de auga dispoñible. No caso de Vigo, a presa de Eiras dispón de 22 hectómetros que dan para un consumo de 7 meses.
“En decembro poderíamos estar sen auga, é un risco moi grave, non hai nada tan grave como deixar a un territorio sen auga, ofrecémonos a pagar porque sabemos da importancia. Estamos en situación de risco e a Xunta debe traballar para que Vigo e once municipios máis teñan auga”, engadiu Caballero.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.
