Carmela Silva cualifica de “éxito absoluto” os resultados de “DepoComparte”, “Depo Informa” e do servizo de mantemento dos campos de fútbol

A presidenta provincial destacou que este ano se adiantarán a xaneiro-febreiro todas as bases para as axudas “para que cheguen antes aos clubs e asociacións deportivas”
Publicado por o día 14/01/2019 na sección de Deputación de Pontevedra

Carmela Silva cualifica de “éxito absoluto” os resultados de “DepoComparte”, “Depo Informa” e do servizo de mantemento dos campos de fútbol

A presidenta da Deputación, Carmela Silva, manifestou a súa satisfacción polo balance “moi positivo” que están a acadar os servizos “DepoComparte”, “Depo Informa”, e o servizo de mantemento dos campos de fútbol, que a institución provincial puxo en marcha fai tempo. “O deporte é unha das nosas prioridades desde que chegamos ao Goberno fai case 4 anos, e así está definido no Plan estratéxico de deportes, porque é a auténtica revolución do s. XXI e é unha demanda social potentísima que as administracións temos a obriga de fomentar”.

Máis polo miúdo, “DepoComparte”, que permite que os concellos, entidades e clubs deportivos que o desexen poidan contar con material para eventos deportivos de maneira totalmente gratuíta, atendeu xa preto de 250 peticións. A través deste servizo, o Goberno de Carmela Silva está poñendo a súa disposición 10 carpas 3×3, 200 conos, 4 arcos de meta, 48 “Fly Banners”, 12 “Sky Dancers”, 60 vallas, 2 bicicletas adaptadas e 2 podios. No que respecta a “Depo Informa”, xa son máis de 180 clubs e entidades inscritas nesta ferramenta 3.0 que ten como finalidade mellorar a xestión do deporte na provincia. Esta iniciativa, aberta a todas as entidades, trátase dunha base de datos de clubs deportivos, a través da cal todas as entidades deportivas poden transmitir e dispoñer de información en tempo real de asuntos de grande interese para o fomento do tecido asociativo deportivo, como poden ser liñas de axudas e subvencións. Pola súa banda, a Deputación de Pontevedra destinou 520.000 euros ao mantemento dos campos de fútbol de preto de 50 concellos da provincia, dos que 351.000 euros foron para campos de herba sintética e 169.000 euros para campos de fútbol naturais.

Para rematar, Silva apuntou que este ano “adiantaremos a xaneiro-febreiro todas as bases para as axudas en materia de deportes para que cheguen moito antes aos clubs e asociacións deportivas” e resaltou que tamén nas próximas semanas informará dos “novos convenios cos clubs de elite, a excelente acollida que o deporte está a dar á nova marca provincial para deportistas de elite DepoDan e DepoPromesas, e as novidades da edición deste ano de DepoDesafío ou das DepoAndainas”.