Catro persoas feridas, dúas delas excarceradas, en senllos accidentes ocorridos no concello da Estrada

Publicado por o día 22/09/2019 na sección de Sucesos

Catro persoas feridas, dúas delas excarceradas, en senllos accidentes ocorridos no concello da Estrada

Un accidente entre dous turismos deixou esta madrugada dúas persoas feridas. Foi necesario, ademais, o uso do material de excarceración dos membros do GES da localidade para liberar aos dous feridos do interior dos vehículos.

Ao redor das 3:30 horas, unha persoa particular informaba ao 112 Galicia dun accidente entre dous vehículos, na PO-841, á altura de Baloira, no concello pontevedrés da Estrada.

Nada mais recibir o aviso, desde o Centro de Atención ás Emerxencias (CIAE) 112 Galicia alertouse ao Servizo de Urxencias Sanitarias de Galicia-061, aos Bombeiros do Deza e aos membros do GES e de Protección Civil da localidade. Tamén se solicitou a colaboración dos axentes de Tráfico que, decontado, se dirixiron ao lugar.

Unha vez no punto, os membros do GES, confirmaron a excarceración dos dous feridos,  que foron trasladados polos servizos sanitarios ao centro hospitalario de referencia.

Ata o lugar, tamén se desprazou persoal do servizo de mantemento da estrada que se encargou das tarefas de limpeza da vía.

Tamén, na a mesma localidade, sobre as 22:00 horas deste sábado, ocorría outro accidente con tres coches implicados, na PO-541, punto quilométrico 13, en Couso e dúas persoas resultaron feridas.

O 112 Galicia tivo constancia do suceso, grazas á chamada dunha persoa particular. Tras o aviso, desde o 112 Galicia alertouse á Garda Civil de Tráfico, aos membros do GES e de Protección Civil da localidade e ao persoal do servizo de mantemento da vía.

O Servizo de Urxencias Sanitarias de Galicia-061 confirmou ao 112 Galicia o traslado das dúas persoas feridas o centro hospitalario de referencia.

Saída de vía en Santiago

Por outra banda, pasados dez minutos das 23:00 horas da noite pasada, o CIAE era informado da saída de vía dun turismo, en Santiago de Compostela. Unha persoa tivo que ser trasladada polos servizos sanitarios.

Segundo a información facilitada ao 112 Galicia polas testemuñas que presenciaron o accidente, tratouse dun vehículo que ao saírse da vía saltou a mediana da AP-9, á altura do barrio santiagués de Conxo.

Ademais do persoal do Servizo de Urxencias Sanitarias de Galicia-061 foron informados polo 112 Galicia, os axentes de Tráfico, da Policía Local, de Protección Civil e o persoal do Servizo de  Autoestradas da AP-9.