CCOO estuda convocar mobilizacións se a patronal das residencias privadas da terceira idade non introduce melloras no convenio

O sindicato critica que as empresas do ámbito unicamente formulen recortes de dereitos
Publicado por o día 11/10/2016 na sección de CC.OO,Sindicatos,Vigo

CCOO estuda convocar mobilizacións se a patronal das residencias privadas da terceira idade non introduce melloras no convenio

A Federación de Sanidade de Comisións Obreiras de Galicia (CCOO-Sanidade) estuda mobilizcaións se a patronal das residencias privadas da terceira idade non introduce melloras no convenio colectivo. O sindicato critica que, após varios meses de reunións, as empresas do ámbito rexeitaron negociar: unicamente formulan recortes de dereitos, negándose a escoitar propostas de mellora.

Na última xuntanza, os sindicatos presentaron unha proposta que consideran «realista», que consistiría nun incremento salarial do 1,5 % para este ano e 2017. Así mesmo, percibir en doce meses o complemento de asistencia e incluílo no salario base.

Así mesmo, as organizacións sindicais pediron a retirada das propostas patronais que pretendían endurecer o rexime disciplinario, e solicitaorn tamén que se respecten as cuestións relativas á antigüidade do persoal, que se manteña a cláusula de ultraactividade do convenio e que a xornada anual se reduza en vinte e unha horas. Como xa se indicou, as empresas do ámbito non aceptaron ningunha das propostas.

CCOO agardará ata o vindeiro 26 de outubro para coñecer a oferta definitiva que formule a patronal. Con todo, se non houber ningún cambio, o sindicato porase en contacto con outras orgainzacións para convocar mobilizacións conxuntas.