COGAMI inicia en Vigo curso para fomentar o emprego das persoas con discapacidade

Aínda quedan prazas libres para poder apuntarse a este curso que é gratuíto
Publicado por o día 18/09/2018 na sección de Galicia,Vigo

COGAMI inicia en Vigo curso para fomentar o emprego das persoas con discapacidade

A Confederación Galega de Persoas con Discapacidade (COGAMI) inicia o luns 24 de setembro nas instalacións que ten en Vigo (rúa Teixugueiras, nº15, baixo) un curso de Profesional de limpeza de superficies e mobiliario en edificios e locais dirixido a persoas que teñen certificado de discapacidade ou incapacidade laboral recoñecida para profesión habitual.

Esta acción formativa, con duración de 160 horas lectivas teóricas e prácticas, impartirase durante as mañás de luns a venres en horario de 9 a 14 horas ata o 8 de novembro, estando dividida nos seguintes módulos: técnicas básicas de limpeza, limpeza de mobiliario interior, camareira/o de pisos, limpeza de espazos abertos, de instalacións e equipamentos industriais e mantemento básico de edificios e locais.

O número total de prazas é de 15, quedando aínda vacantes para aquelas persoas que poidan estar interesadas en participar neste curso que forma parte do programa de inserción laboral Máis Emprego que financia Fundación Bancaria “la Caixa” e o Fondo Social

Europeo, un programa que se desenvolve nas comarcas de O Salnés, Pontevedra e Vigo, co fin de dotar de competencias necesarias ás persoas con discapacidade de cara á inserción laboral.

Máis Emprego proporciónalle ao alumnado destrezas profesionais que lle permiten un rendemento competitivo no mercado laboral ademais de desenvolver habilidades persoais para a súa participación social. Desde que iniciou este programa en 2017, xa son 100 as persoas que lograron inserirse tras pasar por Máis Emprego.