A colaboración entre BorgWarner e o Grupo de Tecnoloxía Enerxética faise cun dos Premios á Transferencia de Tecnoloxía 2017

Os galardóns, promovidos pola Real Academia de Ciencias, entregaranse proximamente en Santiago de Compostela
Por o 07/11/2017 | Sección: Universidade de Vigo
A colaboración entre BorgWarner e o Grupo de Tecnoloxía Enerxética faise cun dos Premios á Transferencia de Tecnoloxía 2017

Levan máis de dez anos de colaboración continuada a través de proxectos nacionais, autonómicos e financiados directamente pola propia empresa e o seu traballo conxunto sobre a redución de emisións contaminantes procedentes dos tubos de escape dos vehículos fíxoos merecentes dun dos Premios de Transferencia de Tecnoloxía en Galicia 2017. Falamos da empresa BorgWarner Emissions Systems Spain, filial española da multinacional Borgwarner, e do Grupo de Tecnoloxías Enerxéticas da Universidade de Vigo, un equipo liderado polo profesor da Escola de Enxeñería Industrial José Luis Míguez Tabarés, composto por máis de trinta investigadores e investigadoras que teñen entre as súas principais liñas de investigación, os sistemas anticontaminación de motores de automoción.

“Este premio pon en valor a capacidade que temos como grupo de realizar transferencia de tecnoloxía, para colaborar coas empresas e poder axudalas”, explica a profesora María Concepción Paz, investigadora do grupo responsable desta liña de investigación e principal enlace do GTE coa empresa, quen apunta que a colaboración co sector empresarial é un dos puntais básicos deste grupo de investigación.

Promovidos pola Real Academia Galega de Ciencias coa colaboración da Axencia Galega de Innovación, GAIN, da Xunta, os premios recoñecen as mellores prácticas de transferencia de coñecemento procedente dos organismos de investigación ao tecido produtivo. Entregaranse proximamente en Santiago de Compostela nunha cerimonia na que ademais deste galardón, bautizado como Mellor caso de éxito de transferencia de tecnoloxía na categoría de grandes empresas, se entregarán tamén o premio ao mellor traballo de investigación aplicada, que neste caso recaeu nunha nova tecnoloxía deseñada na Universidade de Santiago de Compostela, e outro específico para pequenas e medianas empresas, outorgado á empresa HGBeyond Material Science.

O premio para a empresa BorgWarner ten carácter honorífico, mentres que o grupo de investigación percibirá 6000 euros netos polo seu esforzo no eido da transferencia de tecnoloxía.

Sistemas anticontaminación para automóbiles

A colaboración co Grupo de Tecnoloxía Enerxética da Universidade de Vigo permitiulle á empresa BorgWarner desenvolver unha ferramenta innovadora para o deseño e validación dos sistemas anticontaminación en motores de combustión interna de vehículos que implantará en todas as fábricas que ten repartidas polo mundo, desde Estados Unidos ata China ou a India. O proxecto galardoado consiste nunha ferramenta de cálculo computacional que permite simular o comportamento dos sistemas de redución de emisións contaminantes para vehículos que a empresa fabrica. Isto suporá unha vantaxe competitiva importante, dado que a normativa europea revisa continuamente á baixa os límites das emisións dos coches, polo que é determinante para o sector contar con solucións máis avanzadas e eficientes no menor prazo posible, coa garantía de que cumpren os requisitos establecidos.

A nova ferramenta permite non só minimizar os ensaios físicos para cada novo desenvolvemento ou modificación –moi custosos e prolongados no tempo–, senón tamén mellorar a capacidade de resposta e a fiabilidade ao permitir explorar múltiples opcións durante as etapas de deseño. Grazas á solución desenvolvida a través do proxecto galardoado, todos os centros de BorgWarner poderán testar cada novo sistema anticontaminación ou cada modificación dun existente, de xeito rápido e económico, a través de prototipos virtuais xerados por ordenador.

Se ben nos últimos anos se avanzou “moitísimo” na redución das emisións, tal e como recalca a investigadora, nestes intres cobra especial importancia a aplicación á automoción destas novas tecnoloxías.

Noticias de última hora en Vigo