Comezan as accións de voluntariado para a rexeneración en zonas queimadas na zona de Melón

Amigos da Terra busca promover a sensibilización e a mobilización social que contribúa a impulsar os cambios necesarios nas políticas forestais que son a orixe do problema dos lumes forestais en Galicia.
Publicado por o día 28/11/2017 na sección de Galicia,Medio Ambiente,Ourense

Comezan as accións de voluntariado para a rexeneración en zonas queimadas na zona de Melón

O pasado domingo 26 de novembro, Amigos da Terra en colaboración co grupo Vergasta levaron a cabo a primeira acción de rexeneración de zonas afectadas polos incendios forestais no monte comunal de Tourón (Melón).

Varias persoas da zona convocadas por Vergasta e acompañados por unha vintena de voluntarias e voluntarios que acudiron ao chamamento de Amigos da Terra, xuntáronse nunha das zonas máis afectadas polos lumes do pasado mes para realizar as primeiras actuacións de recuperación, orientadas á retención do solo fronte a erosión que poida sufrir debido as chuvias dos vindeiros meses.

As accións levadas a cabo consistiron en dispersar palla nas zonas que tras os lumes quedaron sen cobertura vexetal e a construción de barreiras a partir de restos vexetais en franxas perpendiculares á pendente nas zonas preto das correntes de auga. A implicación e o duro traballo levado a cabo durante a xornada estendeu a as accións ao longo dunha superficie aproximada de sete hectáreas.

Con estas actuacións, ademais da recuperación de zonas forestais arrasadas polos lumes, búscase a sensibilización e mobilización social que impulse os cambios nas políticas forestais necesarios para evitar que no futuro o risco e o alcance dos incendios forestais segan sendo un problema perpetuo no noso país.

O próximo domingo, continuarase coas actuacións de recuperación nesta zona ata chegar a cubrir toda á superficie arrasada polo lume na zona de monte comunal, dunhas 11 hectáreas, con estas medidas de “primeiros auxilios” de protección e mantemento do solo, que máis adiante poderían complementarse con accións para axudar na rexeneración da cobertura vexetal. Ao mesmo tempo,  ao longo dos próximos meses, contemplase levar a cabo actuacións semellantes noutras zonas afectadas polos incendios.