Dende Galegas 8M denunciamos que tras realizar unha acción de rúa ás 12 horas en Urzáiz, varios axentes da policía nacional e un axente da policía local, pedíronnos a autorización para facer a acción de “Un violador no teu camiño” e cortar o tráfico.

Amosámoslle a comunicación feita á Subdelegación do Goberno con acuse de recibo; tras realizar as conseguintes comprobacións ante a Subdelegación do Goberno, os axentes da policía nacional confirman que o acto realizado foi comunicado correctamente en tempo e forma.

O axente da polícia local (que non portaba a súa placa identificatoria), cun ton desafiante e agresivo afirmou que non estabamos autorizadas para tal acción de rúa e comezou a pedir os documentos de identidade manifestando que ía denunciar e multar a algunhas das promotoras e asistentes ao acto por desobediencia.

Malia os intentos de diálogo, o axente comezou a tomar nota dos DNI de varias mulleres mentres que, en solidariedade coas compañeiras identificadas, outras asistentes amosamos tamén a documentación. Este axente mantivo en todo momento un talante desafiante e intimidatorio, burlándose das mulleres que intentaban razonar con el e ate mostrando satisfacción ante a fustración de todas, incluídas algunhas crianzas que acompañaban ás súas nais e que choraban en resposta ao medo e ameazas coas que intentaba calarnos.

Entendemos o acontecido como unha agresión machista que non tiña outra fin que amedrentar ás mulleres que tomamos as rúas nun día histórico e limitar os nosos dereitos. Queremos así mesmo denunciar o ataque directo ao feminismo na actuación da Polícia Local, nun intento de reprimirnos como mulleres libres e cidadás.

Exerceuse un claro abuso de poder e un exercicio de arbitrariedade por parte do axente, sen que ningún outro axente presente intervira cunha actitude mediadora para poñer fin ao ataque.
O concello de Vigo ten un problema moi grave se o seu corpo policial segue abusando da súa situación de poder para amedrentar ós movementos socias en xeral e á loita feminista en particular sen respeitos pola lei.

Dende Galegas 8M esiximos que o Concello investigue coa necesaria perspectiva de xénero o acontecido e adopte cantas medidas sexan precisas para garantir que sucesos como este non volten a ocorrer. Seguiremos denunciando as agresións ao movemento feminista e respostaremos ante calquer torpedeo institucional até que se asuman responsabilidades. Lonxe de silenciarnos continuaremos reivindicando que as rúas tamén son nosas e que a loita feminista é imparábel.

Noticias Vigo

Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.