Conde pon de relevo en Vigo a contribución dos emprendedores ao desenvolvemento económico de Galicia

O conselleiro de Economía, Emprego e Industria, Francisco Conde, sinala na entrega dos premios de AJE Vigo que os novos empresarios están a liderar a transformación da Comunidade
Publicado por o día 29/11/2019 na sección de Galicia,Vigo,Xunta de Galicia

Conde pon de relevo en Vigo a contribución dos emprendedores ao desenvolvemento económico de Galicia

O conselleiro de Economía, Emprego e Industria, Francisco Conde, sinalou onte na gala de entrega dos premios de AJE Vigo que esta iniciativa é unha constatación do talento emprendedor dos mozos e mozas de Vigo e a súa comarca, e unha mostra clara da súa contribución ao desenvolvemento económico de Galicia.

Na súa intervención, o conselleiro sinalou que os emprendedores están a liderar a transformación de Galicia, e lembrou que, segundo o último informe GEM, a porcentaxe de poboación que iniciou ou se atopa nos primeiros anos dun proxecto empresarial acadou en 2018 o 5,6% do total dos habitantes de Galicia, superando en máis de medio punto á de 2017 (5,06%).

Ademais, catro de cada dez das iniciativas emprendedoras incipientes (37,8%) realizan actividades innovadoras, e a porcentaxe dos proxectos empresariais que exportan subiu ata o 32%. O crecemento desta cifra está liderado pola iniciativa feminina, e así, en máis do 57% dos casos a persoa que decide iniciar unha nova iniciativa empresarial é unha muller.

Francisco Conde fixo fincapé en que o traballo dos emprendedores galegos beneficia o conxunto da sociedade galega, contribuíndo á creación de emprego e de benestar. Por iso, sinalou que Galicia seguirá ao lado dos seus emprendedores, traballando para consolidar a Comunidade como unha terra de oportunidades.

Entre outras iniciativas neste ámbito, está a Lei de implantación empresarial, que achega máis simplificación administrativa, máis incentivos fiscais e máis facilidades para acceder ao solo. Tamén é o caso da plataforma StartIN Galicia, a rede galega de aceleradoras, mediante a cal se achegou un apoio integral a máis de 1000 proxectos nos últimos cinco anos. Ademais, os emprendedores galegos teñen á súa disposición diferentes apoios económicos para financiar os seus proxectos.

O conselleiro de Economía, Emprego e Industria sinalou que Vigo é unha cidade de referencia para Galicia cando se fala de economía, de emprego e de emprendemento, lembrando que nos primeiros meses se puxeron en marcha na cidade 466 empresas, a unha media de 1,5 ao día.

Comentar noticia

Your email address will not be published.