O Consorcio Casco Vello de Vigo finaliza o ano coa adquisición dun novo edificio na rúa Abeleira Menéndez

A compra desta nova edificación formalizouse por valor de 140.000 euros e supón a oitava adquisición dun edificio nesta rúa por parte do organismo rehabilitador

O Consorcio Casco Vello de Vigo (CCVV) vén de formalizar a adquisición dun novo edificio situado no número 16 da rúa Abeleira Menéndez. Unha nova que se suma á firma por parte do Instituto Galego da Vivenda e Solo e o Concello de Vigo do convenio que regula o funcionamento do organismo e que hoxe celebrou o seu presidente, Ignacio López-Chaves. Neste sentido, o tamén delegado territorial da Xunta en Vigo incidiu na importancia deste acordo, por canto garante a continuidade do ente rehabilitador ata o vindeiro 2021.

Segundo informou hoxe o representante do Goberno galego, a operación formalizouse por valor de 140.000 euros e supón a oitava adquisición dun edificio nesta rúa da zona alta do barrio histórico por parte do CCVV –organismo creado en 2005 e integrado nun 90 por cento pola Xunta de Galicia e nun 10 por cento polo Concello de Vigo–.

López-Chaves explicou que o comité executivo do Consorcio Casco Vello de Vigo ( CCVV) aprobou a compra deste novo edificio nunha reunión celebrada hoxe con carácter extraordinario. Ao respecto, apuntou que a tramitación do proxecto xa está en marcha e que a reforma contempla dúas vivendas e un local comercial.

O presidente do CCVV cifrou en máis de 400.000 euros o investimento dedicado este ano a compra dos tres edificios en carteira do Consorcio, xa que o de Abeleira Menéndez se suma aos previamente adquiridos na Ribeira do Berbés 7 e 41. “O balance non podería satisfacernos máis, tendo en conta as limitacións que temos á hora de negociar cos propietarios dos inmobles”, dixo, en clara referencia a que hai edificios en multipropiedade ou sinxelamente cuxos donos non queren vender. Así mesmo, celebrou que a labor do Consorcio durante estes anos incentivara a varios propietarios a reformar por motu proprio.

Asemade, recordou que neste 2017 adxudicáronse mediante concurso seis novas vivendas nas promocións Ferrería 10-12 e Ferrería 45-47 e puxéronse en marcha as promocións de Subida ao Castelo 12 e Subida á Costa 5 (xa finalizadas e nas primeiras fases do seu concurso de adxudicación) e Ferrería 8 e Cruz Verde 8. Catro edificacións que permitirán pór a disposición dos veciños da cidade olívica un local comercial e sete novas vivendas, varias delas de gran superficie para facilitar a incorporación á zona de familias, extremo sobre o que fixo especial fincapé o delegado territorial. López-Chaves subliñou a importancia de adaptar a oferta á demanda de pisos de maiores dimensións, co obxectivo de “dar estabilidade as familias, cun proxecto de futuro no barrio a longo prazo”.

Todas estas intervencións –xunto a outros traballos técnicos orientados á elaboración de proxectos de próximas rehabilitacións- supuxeron un investimento superior aos 2 millóns de euros.

99 vivendas rehabilitadas

Ata o momento actual o Consorcio do Casco Vello de Vigo leva adquiridos 73 inmobles, dos que 54 xa foron rehabilitados e cinco están en execución.
Rehabilitáronse 99 vivendas, das que 80 foron vendidas e 10 están ocupadas en réxime de alugueiro. Tamén se rehabilitaron 31 locais comerciais, dos que se venderon seis e oito están ocupados en réxime de alugueiro, estando os 17 restantes en fase de adxudicación.

Previsión 2018

O Consorcio do Casco Vello de Vigo iniciará en 2018 a rehabilitación de catro novas edificacións e continuará coa rehabilitación doutras seis, tal como acordou o consello de administración do mesmo celebrado no pasado mes de setembro, que aprobou o programa de actuacións, investimentos e financiamento para o próximo ano.
Deste xeito, o Consorcio, no que a Xunta de Galicia participa nun 90 por cento a través do Instituto Galego da Vivenda e Solo, continuará a rehabilitación dos edificios emprazados en Subida ao Castelo 12, Subida á Costa 5, Cruz Verde 8 e 12 e Ferrería 8 e iniciará a rehabilitación de Praza do Berbés 5, 7 e 41 e de Elduayen 31.
Nos edificios que se atopan xa en obras obteranse nove vivendas e dous locais comerciais.
Prevese que o Consorcio destine á rehabilitación destas edificacións preto de 1,3 millóns de euros.

Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.

SIGUENOS EN TELEGRAM