Convocadas asembleas de traballadores/as de Citroën para preparar a folga deste xoves

O paro laboral convócase para esixir solucións á sobrecarga de traballo na montaxe
Por o 14/05/2019 | Sección: CC.OO,CIG,Galicia,Sindicatos,UGT,Vigo
Convocadas asembleas de traballadores/as de Citroën para preparar a folga deste xoves

Este mércores haberá asembleas de traballadores e traballadoras nas tres quendas laborais das liñas de montaxe, naves e ferraxe para informar e preparar a xornada de folga que a CIG, CCOO e UGT teñen convocada para este xoves, 16 de maio, para esixir solucións á sobrecarga de traballo na montaxe (con especial incidencia na liña 2) e que se contrate ao persoal necesario para poder sacar adiante a actividade.

As tres organizacións sindicais lembran que levan preto de cinco meses solicitando medidas para que o persoal de montaxe teña mellores condicións nos postos de traballo, sen que até o momento a dirección teña adoptado ningún tipo de solución. E así llo volveron recordar, lembrou o representante da CIG, Manuel Rodríguez, na reunión extraordinaria mantida no día de onte co director do centro, que se limitou a apelar ao ‘diálogo e á reflexión’.

Neste senso, a parte social defende tamén a reflexión e o diálogo pero critica a esterilidade destes encontros “xa que a dirección segue sen querer abordar a creación de postos, a redución das cargas de traballo, a recuperación de operacións externalizadas, a falla dun mapa de postos esixentes fisicamente ou a ausencia dunhas rotacións que sirvan para evitar lesións”.

Catro meses agardando solucións

De feito, critican que fora necesario ter enriba da mesa unha convocatoria de folga para que a dirección recoñecera publicamente que hai sobrecarga de traballo na liña 2. Por iso, reiteran a súa disposición ao diálogo, mais insisten en que non van desconvocar a folga do día 16 “porque non nos podemos fiar das boas palabras de quen leva catro meses demorando a posta en marcha de medidas urxentes para mellorar as condicións laborais. Queremos feitos e querémolos xa”.

A este respecto, urxiron a dirección a buscar solucións inmediatas “se non queren atoparse con outra convocatoria de folga para a semana que vén”.

A xornada de folga deste xoves efectivizarase en paros laborais de dúas horas por quenda de traballo no seguinte horario: pola maña de 12 a 14 horas; pola tarde de 14 a 16 horas; e na quenda de noite de 22 a 00 horas.

Comentar noticia

Your email address will not be published.