Curtametraxes, longos, documentais e conferencias centran a cuarta edición do Festival de Cinema Inclusivo de Vigo

O alcalde aplaude o traballo da organización “a favor do cinema inclusivo” e garante o seu apoio en próximas edicións. Celébrase do 22 ao 26 de outubro.
Publicado por o día 18/10/2019 na sección de Concello de Vigo,Galicia,Vigo

Curtametraxes, longos, documentais e conferencias centran a cuarta edición do Festival de Cinema Inclusivo de Vigo

O Festival de Cinema Inclusivo de Vigo, que se celebra do 22 ao 26 de outubro no Auditorio do Concello e no Cinema Salesianos, presentou esta
mañá a súa cuarta edición cun completo programa concibido para achegar o cinema a todas as persoas grazas ao sistema de audiodescripción e subtitulados.

“Sodes valentes pola vosa maneira de diversificar a cultura, co que conseguistes que o cinema sexa máis accesible para persoas xordas e cegas”, agradeceu Caballero aos organizadores do certame á vez que lles garantiu o seu apoio para próximas edicións. “O voso éxito é o éxito de toda a cidade e iso ten un gran valor”, engadiu.

O director do festival, Gonzalo Suárez, destacou que o evento seguirá apostando por dúas seccións competitivas, unha de documentais inclusivos e outra de curtametraxes audio descritos e subtitulados. Entre os curtos seleccionados, que se poderán ver o sábado pola tarde, atópanse varios de cineastas vigueses como “Marusía”, de Pedro Sancho, e “16 de decembro”, de Álvaro Gago, así como o documental “Sorrisos transformadores”, unha peza ao redor da vida dos nenos e nenas trans, dos tamén vigueses Noemí Chantada e Óscar Pardo.

Suárez apuntou que nesta edición o tema principal serán as enfermidades raras e proxectaranse, entre outros, o documental “Jóvenes invisibles”, de Isabel Gemio, que estará presente na proxección.

Tamén participaron na presentación Carmela Silva, presidenta da Deputación de Pontevedra, que destacou que “o obxectivo que diferencia este festival do resto é o seu apoio á democratización do audiovisual”; Jacobo Sutil, director de Agadic, e a director da área comercial de CaixaBank en Vigo, Gonzalo Talegón. O festival é gratuíto e a entrada libre ata completar o aforo.

Comentar noticia

Your email address will not be published.