Luís Bará: “O 12X hai que abrir un novo tempo na Xunta da man do BNG que poña o país a funcionar ao servizo da maioría social”

O cabeza de lista do BNG subliña que na actual crise é fundamental “dar a batalla” na defensa dos dereitos da clase traballadora fronte aos poderes económicos que queren “sacar tallada”
Publicado por o día 18/06/2020 na sección de BNG,Galicia,Política,Vigo

Luís Bará: “O 12X hai que abrir un novo tempo na Xunta da man do BNG que poña o país a funcionar ao servizo da maioría social”

O BNG presentou hoxe en Vigo ante representantes de delegadas e delegados sindicais da CIG as propostas do seu programa de goberno en materia económica, política laboral e de fortalecemento e impulso dos servizos públicos. O cabeza de lista Luís Bará, acompañado da candidata Montse Prado, asegurou que o 12X é o momento para abrir un novo tempo político na Xunta da man do BNG que poña Galiza a funcionar activando todos os recursos do país ao servizo da maioría social.

Bará falou dos once anos de parálise e de devalo do PP nos que houbo unha sangría demográfica, en materia económica, industrial, de emprego e deterioro de servizos públicos fundamentais convertidos en negocios. Como contrapunto, sinalou que o BNG quere poñer en marcha todo potencial que ten Galiza “cun proxecto de país, transformador, liderado polo nacionalismo para facer fronte ás políticas da dereita e do centralismo que nos trouxeron ata aquí”.

Dentro do programa para o futuro o BNG destaca que é fundamental activar un cambio de status político de Galiza para ter capacidade de decisión e intervir en sectores que son fundamentais, garantir a intervención pública na economía nacionalizando sectores económicos e empresas estratéxicos, activar un plan social de vivenda, e crear unha banca pública galega que fomente a intervención e actuación do goberno en sectores produtivos e tamén a través da obra pública.

Outro aspecto fundamental que Bará puxo sobre a mesa é a aposta pola innovación e a investigación, creando un ecosistema galego de investigación coas universidades e os centros tecnolóxicos e as empresas que permita transferir coñecemento ao tecido produtivo. Tamén apuntou a necesidade de desenvolver un programa económico que active os sectores onde Galiza ten capacidade de medre, de xeración de emprego e riqueza dende unha perspectiva de país e de reparto desa riqueza para beneficiar á maioría social.

O cabeza de cartel falou de propostas no ámbito da enerxía e da industria na comarca de Vigo, nomeadamente na reactivación de sectores importantes como o naval e a automoción, e tamén para o desenvolvemento económico e a dotación de servizos avanzados no rural.

Finalmente, Bará cualificou de fundamental na crise económica que se está a vivir “dar a batalla” na defensa dos dereitos laborais e salariais da clase traballadora que, ao seu entender, demostrou ser esencial para facer fronte a toda a emerxencia sanitaria e social provocada pola crise da COVID-19. “A defensa dos seus dereitos e intereses a partir de agora ten que ser fundamental porque imos asistir a unha batalla onde os poderosos e os grandes poderes económicos van querer sacar tallada desta crise”, subliñou, engadindo que o BNG vaise poñer do lado da clase traballadora e da clase do país.

“Co liderado do BNG, co impulso e liderado de Ana Pontón, Galiza vai abrir unha nova etapa a partir do 12 de xullo na que a clase traballadora vai ser fundamental, tamén os seus dereitos, o traballo e as expectativas dun traballo digno para a xente deste país, sobre todo da xente moza, que non pode ter no paro, na precariedade ou na emigración, as únicas alternativas vitais”, finalizou.

Comentar noticia

Your email address will not be published.